امریکہ کے صدر ڈونلڈ ٹرمپ نے ایران کے لیے ایک نئی ڈیڈ لائن مقرر کرتے ہوئے کہا ہے کہ اب تہران کے پاس منگل رات آٹھ بجے تک کا وقت ہے کہ وہ یا تو معاہدہ کرے یا آبنائے ہرمز کو کھول دے۔
صدر ٹرمپ نے سخت الفاظ میں خبردار کیا کہ اگر ایران نے مطالبات تسلیم نہ کیے تو اسے سنگین نتائج کا سامنا کرنا پڑے گا۔ انہوں نے اشارہ دیا کہ ایران کے اہم بنیادی ڈھانچے جیسے بجلی گھر اور پل نشانہ بن سکتے ہیں۔
یہ بیان ایسے وقت میں سامنے آیا ہے جب دونوں ممالک کے درمیان کشیدگی میں مسلسل اضافہ ہو رہا ہے۔ اس سے قبل بھی صدر ٹرمپ ایران کو 48 گھنٹوں کی مہلت دے چکے ہیں، جسے اب کئی بار بڑھایا جا چکا ہے۔
صدر ٹرمپ کا کہنا ہے کہ ایک جانب مذاکرات جاری ہیں، لیکن دوسری جانب امریکہ ہر ممکن فوجی کارروائی کے لیے بھی تیار ہے۔ انہوں نے یہ بھی دعویٰ کیا کہ ایران کے اندر کئی لوگ اپنی حکومت کے خلاف ہیں اور تبدیلی چاہتے ہیں۔
رپورٹس کے مطابق صدر ٹرمپ نے ایک ایرانی پل کی تباہی کا بھی ذکر کیا اور ایران پر زور دیا کہ وہ دیر ہونے سے پہلے فیصلہ کرے۔
دونوں ممالک کے درمیان سخت بیانات کے باوجود سفارتی کوششیں جاری ہیں، تاہم حالات تیزی سے نازک ہوتے جا رہے ہیں۔
