امریکی ویزوں پر فوری پابندی افغان پاسپورٹ رکھنے والوں کے لیے سخت جانچ کا اعلان

امریکہ نے افغان پاسپورٹ رکھنے والے تمام افراد کے لیے ویزوں کا اجرا فوری طور پر روک دیا ہے۔ حکومت نے اس اقدام کو قومی سلامتی اور عوامی تحفظ کے لیے ضروری قرار دیا ہے۔ اس کے ساتھ ہی تمام پناہ گزین درخواستوں پر بھی اچانک پابندی عائد کر دی گئی ہے۔

یہ فیصلہ اُس واقعے کے بعد سامنے آیا جس میں واشنگٹن ڈی سی میں پیش آنے والی فائرنگ کے نتیجے میں نیشنل گارڈ کا ایک اہلکار جاں بحق اور دوسرا شدید زخمی ہوا۔ مشتبہ شخص افغان نژاد بتایا جا رہا ہے، جس کے بعد حکومت نے جانچ کے نئے سخت اصول نافذ کر دیے ہیں۔

امریکی حکام کے مطابق یو ایس سی آئی ایس کے افسران کو ہدایت دی گئی ہے کہ جب تک ہر درخواست گزار کی مکمل چھان بین نہیں ہو جاتی، پناہ گزین فیصلے روک دیے جائیں۔ اس فیصلے کے بعد بائیڈن دور میں منظور کی گئی کئی درخواستوں کی دوبارہ جانچ بھی شروع کر دی گئی ہے۔

وزارتِ خارجہ نے بتایا کہ افغان پاسپورٹ ہولڈرز کے ایک لاکھ سے زائد زیرِ التواء ویزہ کیس بھی منجمد کر دیے گئے ہیں۔ حکام کا کہنا ہے کہ جب تک نئی سکیورٹی پالیسی مکمل نہیں ہو جاتی، پابندی برقرار رہے گی۔

واقعے میں جاں بحق اہلکار کی شناخت سارہ بیکسٹروم کے نام سے کی گئی ہے، جبکہ ساتھی اہلکار کی حالت تشویشناک ہے۔ حکام کے مطابق یہ معاملہ حساس نوعیت کا ہے اور اس کے بعد امریکہ میں امیگریشن پالیسیوں میں مزید سختی کا امکان بڑھ گیا ہے۔