امریکہ نے ویزا کے لیے بانڈ جمع کرانے والے ممالک کی فہرست تقریباً تین گنا بڑھا دی
امریکہ نے ویزا پالیسی کو مزید سخت کرتے ہوئے ان ممالک کی فہرست میں نمایاں اضافہ کر دیا ہے جن کے شہریوں کو ویزا درخواست کے وقت بانڈ جمع کرانا لازمی ہوگا۔ نئی پالیسی کے تحت اب مجموعی طور پر اڑتیس ممالک کے شہریوں کو پانچ ہزار سے پندرہ ہزار ڈالر تک بانڈ جمع کرانا پڑے گا۔
ذرائع کے مطابق یہ فیصلہ سابق صدر ٹرمپ کی انتظامیہ کی جانب سے نافذ کردہ پالیسیوں کا تسلسل ہے، جس کا مقصد امریکہ میں غیر قانونی قیام کو روکنا بتایا جا رہا ہے۔ حال ہی میں پچیس نئے ممالک کو اس فہرست میں شامل کیا گیا ہے، جس کے بعد افریقہ، ایشیا اور لاطینی امریکہ کے کئی ممالک اس دائرے میں آ گئے ہیں۔ یہ نیا قانون اکیس جنوری سے نافذ العمل ہوگا۔
امریکی حکام کا کہنا ہے کہ یہ بانڈ سسٹم اس بات کو یقینی بنانے کے لیے ہے کہ ویزا حاصل کرنے والے افراد مقررہ مدت کے بعد امریکہ میں قیام نہ بڑھائیں۔ تاہم، بانڈ جمع کرانے کے باوجود ویزا ملنے کی کوئی ضمانت نہیں دی جاتی۔ اگر ویزا مسترد ہو جائے یا ویزا ہولڈر قواعد پر عمل کرے تو یہ رقم واپس کر دی جائے گی۔
ماہرین کا ماننا ہے کہ اس فیصلے سے کئی غریب ممالک کے شہریوں کے لیے امریکی ویزا حاصل کرنا انتہائی مشکل ہو جائے گا۔ اس کے ساتھ ہی ویزا درخواست دہندگان کو ذاتی انٹرویو، سوشل میڈیا تفصیلات اور سفری تاریخ فراہم کرنا بھی لازمی قرار دیا گیا ہے۔
