یوکرین کے صدر وولودیمیر زیلنسکی نے اعلان کیا ہے کہ یوکرین کے لیے امریکی سیکیورٹی ضمانتوں سے متعلق دستاویز سو فیصد تیار ہے اور دستخط کی تاریخ کا انتظار کیا جا رہا ہے۔ انہوں نے یہ بات لتھوانیا کے دارالحکومت میں صحافیوں سے گفتگو کے دوران کہی۔
صدر زیلنسکی کے مطابق، دستخط کے بعد یہ معاہدہ امریکی کانگریس اور یوکرینی پارلیمنٹ میں توثیق کے لیے پیش کیا جائے گا۔ انہوں نے کہا کہ یوکرین کی یورپی یونین میں شمولیت کی کوششیں جاری ہیں اور دو ہزار ستائیس تک رکنیت کو وہ معاشی تحفظ کی ضمانت قرار دیتے ہیں۔
زیلنسکی نے بتایا کہ ابوظہبی میں ہونے والی بات چیت ایک طویل عرصے بعد پہلا ایسا سہ فریقی اجلاس تھا جس میں سفارت کاروں کے ساتھ فوجی نمائندے بھی شامل تھے۔ یہ مذاکرات روس کی چار سالہ جارحیت کے خاتمے کی کوششوں کا حصہ ہیں۔
زیلنسکی نے کہا کہ امریکہ مصالحت کی کوشش کر رہا ہے، مگر امن کے لیے تمام فریقوں کو لچک دکھانا ہوگی۔ آئندہ مرحلے کے مذاکرات یکم فروری کو دوبارہ ابوظہبی میں ہوں گے۔ ان بات چیت میں جنگ بندی، فوجی و معاشی امور اور جوہری بجلی گھر سے متعلق نکات بھی زیرِ غور ہیں۔
