یوپی کے طالبعلم کی حیران کن ایجاد اے آئی اُستاد
یوپی کے 17 سالہ طالبعلم کی اے آئی اُستاد کلاس روم میں پڑھاتی ہوئی ویڈیو وائرل
اترپردیش کے ضلع بلند شہر سے تعلق رکھنے والے ۱۷ سالہ طالبعلم کی ایجاد نے پورے ملک میں سب کو حیران کر دیا۔ انٹرمیڈیٹ کے طالبعلم آدتیہ کمار نے ایک جدید مصنوعی ذہانت پر مبنی اُستاد تیار کیا ہے، جس کا نام سوفی رکھا گیا ہے۔ اس روبوٹ اُستاد کی کلاس میں پڑھاتے ہوئے ویڈیو تیزی سے وائرل ہو رہی ہے۔
ویڈیو میں اے آئی اُستاد سوفی خود کو متعارف کراتے ہوئے کہتی ہے کہ وہ طلبہ کے سوالات کے جوابات دینے کے لیے تیار ہے۔ سوفی کو جدید ایل ایل ایم چِپ سیٹ کے ذریعے بنایا گیا ہے، جو بڑے روبوٹ بنانے والی کمپنیوں میں استعمال ہوتی ہے۔
آدتیہ نے اس روبوٹ کی صلاحیت جانچنے کے لیے چند عام معلومات کے سوالات کیے۔ جب اس سے پوچھا گیا کہ بھارت کے پہلے صدر کون تھے؟ تو سوفی نے درست جواب ڈاکٹر راجندر پرساد بتایا۔ اسی طرح وہ پہلے وزیرِاعظم کے سوال پر فوراً پنڈت جواہر لعل نہرو کا نام بتاتی ہے۔
آدتیہ کے مطابق یہ روبوٹ اس وقت صرف بول کر جواب دے سکتا ہے، لیکن بہت جلد اسے لکھنے کی صلاحیت بھی دی جائے گی۔ آدتیہ کا کہنا تھا کہ ہر ضلع میں تحقیقی تجربہ گاہ ہونی چاہیے تاکہ بچے نئی ٹیکنالوجی پر کام کر سکیں۔
