نائب صدر کا پہلا تلنگانہ دورہ شاندار استقبال، اہم تقاریب میں شرکت
نائب صدر سی پی رادھا کرشنن اتوار کے روز اپنے پہلے سرکاری دورۂ تلنگانہ پر حیدرآباد پہنچے، جہاں انہیں راج بھون میں شاندار خیرمقدم پیش کیا گیا۔ اس موقع پر گورنر جِشنو دیو ورما، وزیر اعلیٰ ریونت ریڈی، وفاقی وزیر جی کشن ریڈی اور دیگر معززین موجود تھے۔ نائب صدر کو آمد پر گارڈ آف آنر بھی پیش کیا گیا۔
نائب صدر رادھا کرشنن تلنگانہ میں راموجی ایکسیلینس ایوارڈز کی تقریب میں شرکت کے لیے آئے ہیں، جو فلم سٹی میں منعقد ہو رہی ہے۔ ان کا یہ دورہ ریاست کے لیے نہایت اہم قرار دیا جا رہا ہے۔
اس سے پہلے دہلی میں میڈیا ایوارڈز کی تقریب سے خطاب کرتے ہوئے نائب صدر نے کہا کہ سینما اور سیاست دو مختلف دنیا ہیں لیکن دونوں میں کامیابی یقینی نہیں ہوتی۔ انہوں نے وزیر مملکت سریش گوپی کی دونوں میدانوں میں کامیابی کی ستائش کی۔
انہوں نے مزید کہا کہ میڈیا ملک کی مثبت پیش رفت کو اُجاگر کر کے نوجوانوں میں امید پیدا کرتا ہے۔ میڈیا کی ذمہ داری ہے کہ وہ عوام، خصوصاً کمزور طبقات کی آواز بنے اور منشیات سے پاک معاشرہ تشکیل دینے میں اہم کردار ادا کرے۔
دہلی میں ایک اور تقریب، آڈٹ دیوس سے خطاب کرتے ہوئے نائب صدر نے کہا کہ ملک میں شفافیت، ایمانداری اور جواب دہی قومی اخلاقی دولت ہیں۔ انہوں نے محاسب اعظم کے کردار کو سراہتے ہوئے اسے قوم کے مالی تحفظ کا نگہبان قرار دیا۔
