وندے ماترم کبھی مخالفِ اسلام نہیں تھا راجناتھ سنگھ کا لوک سبھا میں بیان
دفاعی وزیر راجناتھ سنگھ نے لوک سبھا میں واضح طور پر کہا کہ ’وندے ماترم‘ اور ناول ’آنند مٹھ‘ کبھی مخالفِ اسلام نہیں تھے بلکہ اس دور میں بنگال کے نواب اور برطانوی ظلم کے خلاف عوامی جذبات کی نمائندگی کرتے تھے۔
انہوں نے غیر جانبدارانہ جائزے کی ضرورت پر زور دیتے ہوئے کہا کہ زیادہ تر لوگ صرف پہلی دو بندوں سے واقف ہیں جبکہ پوری نظم میں بھارت کی اصل روح بیان کی گئی ہے۔
راجناتھ سنگھ نے کہا کہ آزادی کے بعد وندے ماترم کو نظرانداز کیا گیا اور اسے وہ مقام نہیں ملا جس کا یہ مستحق تھا۔ ان کا کہنا تھا کہ بنگال کے قحط کے دور میں نوابِ بنگال کی بھاری محصول پالیسی نے عوام کو تباہ کر رکھا تھا، اور ناول آنند مٹھ اسی ناانصافی کے خلاف لکھا گیا تھا۔
انہوں نے اپوزیشن پر طنز کرتے ہوئے کہا کہ مفاد پرستی کی سیاست نے ملک کی تقسیم کی بنیاد رکھی۔
سنگھ نے دو ٹوک کہا کہ:
“وندے ماترم اور آنند مٹھ کا مقصد مخالفِ مذہب نہیں تھا، بلکہ عوام کی وہ چیخ تھی جو نواب اور انگریزی حکومت کی ملی بھگت کے خلاف اٹھی تھی۔”
آخر میں انہوں نے اپیل کی کہ ملک کو چاہیے کہ وہ اس قومی ترانے کی مکمل عظمت کو دوبارہ پہچانے اور اسے بھرپور احترام دے۔
