دنیا کا سب سے بڑا آبی سرنگ منصوبہ مکمل کریں گے وزیرِاعلیٰ ریونت ریڈی

تلنگانہ کے وزیرِاعلیٰ ریونت ریڈی نے اعلان کیا ہے کہ حکومت دنیا کی سب سے بڑی 40 کلو میٹر ایس ایل بی سی سرنگ کو جلد مکمل کرے گی۔ یہ منصوبہ 4600 کروڑ روپے کی لاگت سے تیار کیا جا رہا ہے اور اس سے 3 لاکھ ایکڑ زمین کو آبپاشی کی سہولت فراہم ہوگی۔

وزیراعلیٰ ریونت ریڈی نے ناگر کرنول ضلع کے مننیوری پلی میں منصوبے کے مقام کا دورہ کیا اور ایریل الیکٹرو میگنیٹک سروے کا افتتاح کیا۔ انہوں نے کہا کہ حکومت مراپلّی، نکھلا گنڈی اور کیشیا تانڈا کے متاثرہ رہائشیوں کو معاوضہ دے گی اور ان کے مسائل حل کرے گی۔

ریونت ریڈی نے سابقہ بی آر ایس حکومت پر شدید تنقید کی اور کہا کہ نو سال تک سیاسی وجوہات کی بنا پر اس منصوبے کو جان بوجھ کر روکا گیا۔ ان کے مطابق اگر پچھلی حکومت کام مکمل کرلیتی تو یہ منصوبہ صرف 2000 کروڑ روپے میں مکمل ہوسکتا تھا۔

انہوں نے بتایا کہ 1983 میں منظور شدہ اس منصوبے پر 2004 میں وائی ایس راج شیکھر ریڈی کے دور میں کام شروع ہوا تھا۔ لیکن کے سی آر کی حکومت کے دوران اسے جان بوجھ کر روکا گیا۔

ریونت ریڈی نے کہا کہ یہ منصوبہ ریاست کی زرعی ترقی کے لیے انتہائی اہم ہے اور حکومت اسے فوجی ماہرین کی مدد سے محفوظ انداز میں مکمل کرے گی۔ انہوں نے وعدہ کیا کہ آٹھ مزدوروں کی ہلاکت پر حکومت ان کے خاندانوں کی مکمل مدد کرے گی۔