ایران کی پاسداران انقلاب نے دعویٰ کیا ہے کہ اس کی فضائیہ نے بحرین میں نصب امریکی ابتدائی انتباہی ریڈار نظام کو نشانہ بناکر تباہ کردیا ہے۔ اسی دوران ایرانی حکام نے آبنائے ہرمز سے گزرنے والے ایک گیس بردار ٹینکر کے بحری بارودی سرنگ سے ٹکرانے اور دھماکے کا دعویٰ بھی کیا ہے۔ تاہم، دونوں واقعات کی آزادانہ طور پر تصدیق نہیں ہوسکی ہے۔
ایرانی سرکاری خبر رساں ایجنسی ارنا کے مطابق، پاسداران انقلاب نے بتایا کہ بحرین میں امریکی ریڈار پر حملہ جنوبی ایران کے ساحلی شہر سِریک میں ایک مواصلاتی ٹاور پر امریکی حملے کے جواب میں کیا گیا۔ ایرانی حکام نے اس کارروائی کو امریکہ کے لیے انتباہ قرار دیتے ہوئے کہا کہ اسے ایران کے خلاف فضائی کارروائیاں بند کرنی چاہئیں۔
بحرین مشرق وسطیٰ میں امریکہ کا اہم فوجی مرکز ہے، جہاں امریکی بحریہ کے پانچویں بیڑے کا صدر دفتر قائم ہے۔ ایران کی جانب سے بحرین میں امریکی تنصیب کو نشانہ بنانے کا یہ دعویٰ ستمبر کے بعد پہلی مرتبہ سامنے آیا ہے۔ تاہم، امریکہ کی سینٹرل کمانڈ اور بحرین کی وزارت اطلاعات نے فوری طور پر اس دعوے پر کوئی ردعمل ظاہر نہیں کیا۔
آبنائے ہرمز میں ٹینکر بارودی سرنگ سے ٹکرانے کا دعویٰ
ایرانی پاسداران انقلاب نے جمعہ کو دعویٰ کیا کہ آبنائے ہرمز کے مشرقی حصے سے گزرنے والا مائع قدرتی گیس کا ایک ٹینکر بحری بارودی سرنگ سے ٹکرا گیا، جس کے نتیجے میں دھماکہ ہوا۔
برطانوی بحری نگرانی کے ادارے یو کے ایم ٹی او کی جانب سے بھی اس واقعے کی فوری تصدیق نہیں کی گئی۔ ایسوسی ایٹیڈ پریس کے مطابق، اس واقعے کی آزادانہ تصدیق نہیں ہوسکی ہے۔
آبنائے ہرمز میں کشیدگی برقرار
ایران نے بحری جہازوں کو خبردار کیا ہے کہ وہ اس کی اجازت کے بغیر اس اہم سمندری گزرگاہ سے نہ گزریں۔ آبنائے ہرمز عالمی سطح پر تیل اور گیس کی ترسیل کا ایک اہم راستہ ہے، اس لیے یہاں کسی بھی فوجی کارروائی یا بحری راستے میں رکاوٹ سے عالمی توانائی کی تجارت متاثر ہونے کا خدشہ ہے۔
