ڈونلڈ ٹرمپ نے دعویٰ کیا ہے کہ روس اور یوکرین کے درمیان جاری جنگ اپنے اختتام کے قریب پہنچ رہی ہے۔ انہوں نے کہا کہ دونوں ممالک کے درمیان ممکنہ معاہدے کے لیے مذاکرات میں پیش رفت ہورہی ہے اور جلد مثبت نتائج سامنے آسکتے ہیں۔
صحافیوں سے گفتگو کرتے ہوئے ٹرمپ نے کہا کہ انہیں یقین ہے کہ جنگ کے خاتمے کے امکانات پہلے کے مقابلے میں زیادہ مضبوط ہوگئے ہیں۔ ان کا کہنا تھا کہ “یوکرین جنگ کا خاتمہ اب بہت قریب محسوس ہورہا ہے”۔
ٹرمپ نے روس کے صدر ولادیمیر پوتن کے ساتھ ڈونباس خطے سے متعلق کسی بھی خفیہ معاہدے کی خبروں کو مسترد کردیا۔ انہوں نے واضح کیا کہ روس کو پورا ڈونباس دینے پر کوئی بات نہیں ہوئی۔
امریکی صدر نے کہا کہ وہ جنگ ختم کرانے کے لیے “جو بھی ضروری ہوا” کرنے کو تیار ہیں۔ ان کے مطابق عالمی تنازعات کے خاتمے سے عالمی معیشت، تیل کی قیمتوں اور مہنگائی پر مثبت اثرات مرتب ہوں گے۔
ٹرمپ نے یہ بھی کہا کہ جیسے ہی جنگ ختم ہوگی، عالمی منڈی میں تیل کی قیمتوں میں کمی دیکھنے کو ملے گی۔ انہوں نے چین کے صدر شی جن پنگ کے ساتھ ملاقات کا بھی عندیہ دیا جہاں یوکرین جنگ سمیت عالمی مسائل پر گفتگو متوقع ہے۔
