وزیر اعظم مودی ہفتہ کو بہار میں گنگا پر تعمیر 5,500 کروڑ کے نتیش سیتو کا افتتاح کریں گے
وزیر اعظم نریندر مودی ہفتہ کو بہار کے ضلع ویشالی میں دریائے گنگا پر تعمیر کیے گئے نتیش سیتو کا افتتاح کریں گے۔ تقریباً 5,500 کروڑ روپے کی لاگت سے تیار یہ چھ لین والا پل شمالی بہار اور پٹنہ کے درمیان آمد و رفت کو آسان بنانے کے ساتھ زراعت، تجارت اور سیاحت کو فروغ دینے میں اہم کردار ادا کرنے کی توقع ہے۔
حکام کے مطابق، 9.76 کلومیٹر طویل یہ پل ویشالی کے بیدوپور بلاک کو پٹنہ کے مضافات میں واقع کچی درگاہ سے جوڑتا ہے۔ دونوں جانب رابطہ سڑکوں کو شامل کیا جائے تو اس کی مجموعی لمبائی تقریباً 20 کلومیٹر ہوجاتی ہے۔ سابق چیف منسٹر نتیش کمار کے نام سے موسوم اس منصوبے کا تصور ان کے دورِ حکومت میں پیش کیا گیا تھا۔
نتیش کمار نے 2012 میں اس منصوبے کا آغاز کیا تھا، تاہم تعمیراتی کام 2015 میں شروع ہوا۔ ایشیائی ترقیاتی بینک نے اس منصوبے کے لیے مجموعی طور پر 3,472.15 کروڑ روپے فراہم کیے، جبکہ ریاستی حکومت نے اپنے وسائل سے 2,099.54 کروڑ روپے خرچ کیے۔
زراعت اور تجارت کو فروغ ملنے کی امید
ریاستی حکومت کو توقع ہے کہ اس پل کے فعال ہونے سے شمالی بہار کی زرعی پیداوار، خصوصاً لیچی، کیلے، مکئی اور سبزیوں کی نقل و حمل آسان ہوجائے گی۔ اس سے کسانوں کو اپنی پیداوار بڑی منڈیوں تک پہنچانے میں سہولت ملے گی اور تجارت کو فروغ حاصل ہوگا۔
حکومت کے مطابق، بیدوپور سے کچی درگاہ تک کا راستہ سرمایہ کاروں کے لیے بھی پرکشش بن سکتا ہے اور مستقبل میں سیاحت و لاجسٹکس کے مرکز کے طور پر ابھرنے کی صلاحیت رکھتا ہے۔ اس کے علاوہ پٹنہ اور حاجی پور کو جوڑنے والے 40 سال سے زیادہ پرانے مہاتما گاندھی سیتو پر ٹریفک کا دباؤ بھی کم ہونے کی توقع ہے۔
پل کے نام پر سیاسی تنازع
پل کو نتیش سیتو کا نام دیے جانے پر حکمراں این ڈی اے اور اپوزیشن آر جے ڈی کے درمیان سیاسی بحث شروع ہوگئی ہے۔ آر جے ڈی کے کارگزار صدر تیجسوی یادو نے الزام لگایا کہ بی جے پی نے نتیش کمار کے نام پر پل موسوم کرکے انہیں سیاسی طور پر غیر متعلق ظاہر کرنے کی کوشش کی ہے۔
تیجسوی یادو کا دعویٰ ہے کہ 2016 میں جب وہ نائب چیف منسٹر اور وزیر تعمیرات تھے، تب انہوں نے یہ پل بیدوپور کے مجاہد آزادی اکشے وت رائے کے نام سے موسوم کرنے کی تجویز نتیش کمار کو بھیجی تھی۔
دوسری جانب، حکمراں اتحاد نے نام پر اپوزیشن کے اعتراضات مسترد کردیے ہیں۔ مرکزی وزیر چراغ پاسوان نے بھی نتیش کمار کو اس اعزاز کا مستحق قرار دیا۔ اپنے آنجہانی والد رام ولاس پاسوان کے حوالے سے انہوں نے کہا کہ ان کی خدمات کسی پل یا پلّی سے کہیں زیادہ بڑی ہیں اور انہیں سرکاری سطح پر دیگر اعزازات کے ذریعے تسلیم کیا گیا ہے۔



