بدلتا عالمی نظام، ہندوستان کے لیے نئے سفارتی چیلنجز اور مواقع

بدلتے عالمی سیاسی حالات میں بین الاقوامی تعلقات کے نئے اصول اور بڑی طاقتوں کے درمیان بڑھتی مسابقت نے ہندوستان کے لیے نئے چیلنجز اور مواقع پیدا کردیے ہیں۔ عالمی سطح پر کثیرالجہتی نظام کے بجائے منتخب ممالک کے ساتھ اسٹریٹجک شراکت داری کا رجحان بڑھ رہا ہے۔ ایسے میں ہندوستان کے لیے ضروری ہے کہ وہ اپنے قومی مفادات کا تحفظ کرتے ہوئے خودمختاری اور بین الاقوامی قوانین کے مشترکہ اصولوں کو بھی برقرار رکھے۔

معروف امریکی سفارت کار ہنری کسنجر نے اپنی 1994 میں شائع ہونے والی کتاب ’ڈپلومیسی‘ میں عالمی نظام اور طاقتوں کے درمیان تعلقات کا تجزیہ کرتے ہوئے کہا تھا کہ بین الاقوامی استحکام کسی ایک نظریے کی بالادستی سے نہیں بلکہ مختلف ممالک کے قومی مفادات کے درمیان توازن قائم کرنے سے ممکن ہوتا ہے۔ ان کے مطابق، سفارت کاری کا بنیادی مقصد طاقت اور سیاسی جواز کے درمیان توازن پیدا کرنا اور کسی ایک ملک کو دوسرے ممالک پر غیر محدود بالادستی حاصل کرنے سے روکنا ہے۔

تین دہائیوں بعد کسنجر کے نظریات ایک مرتبہ پھر عالمی سیاست میں اہمیت اختیار کررہے ہیں۔ انہوں نے یوروپی سفارت کاری کی روایت، جس کی نمائندگی ریشیلیو، میٹرنخ اور بسمارک جیسے رہنماؤں نے کی، اور امریکی نظریاتی طرزِ خارجہ پالیسی کے درمیان فرق واضح کیا تھا۔

یوروپی طرزِ سفارت کاری میں مختلف ممالک کے قومی مفادات اور طاقت کے توازن کو حقیقت کے طور پر تسلیم کیا گیا، جبکہ امریکی طرزِ فکر میں جمہوریت، مشترکہ اقدار اور اجتماعی سلامتی پر زیادہ زور دیا گیا۔ تاہم، صرف مشترکہ اصولوں کی بنیاد پر عالمی تعلقات قائم کرنا کافی نہیں، کیونکہ بین الاقوامی سیاست میں طاقت کی تقسیم بھی اہم کردار ادا کرتی ہے۔

1815 کا معاہدہ اور عالمی استحکام

کسنجر نے 1815 کی کانگریس آف ویانا کو کامیاب سفارت کاری کی ایک اہم مثال قرار دیا تھا۔ نپولین جنگوں کے بعد یوروپ کی بڑی طاقتوں نے ایسا سیاسی نظام تشکیل دیا جس میں طاقت کے توازن اور سیاسی جواز کو اہمیت دی گئی۔ اس نظام کا مقصد حریف ممالک کے درمیان مقابلے کو ختم کرنا نہیں بلکہ باہمی مفاہمت اور تحمل کے ذریعے استحکام برقرار رکھنا تھا۔

دوسری عالمی جنگ کے بعد قائم ہونے والے بین الاقوامی نظام کی بنیاد امریکی اقتصادی اور فوجی طاقت، اقوام متحدہ، بریٹن ووڈز کے مالیاتی اداروں اور مختلف ممالک کے درمیان دفاعی اتحادوں پر رکھی گئی۔ اس نظام نے سرد جنگ کے دوران بھی اپنا وجود برقرار رکھا، تاہم اس میں طاقت کی سیاست اور 1945 میں فاتح ممالک کے مفادات کا اثر نمایاں رہا۔

موجودہ عالمی حالات میں ہندوستان کے لیے اصل چیلنج یہ ہے کہ وہ مختلف ممالک کے ساتھ اپنے تعلقات اور شراکت داری کو وسعت دیتے ہوئے قومی خودمختاری، بین الاقوامی قانون اور عالمی تعاون کے اصولوں کے درمیان توازن برقرار رکھے۔