ہماچل پردیش کے چمبا ضلع میں ہفتے کی صبح ایک دل دہلا دینے والے بس حادثے میں 7 مسافر جاں بحق اور 11 زخمی ہوگئے۔ پولیس کے مطابق حادثہ صبح تقریباً 7 بج کر 15 منٹ پر بیراغڑھ سے چمبا جانے والی بس کے چالونج موڑ کے قریب پیش آیا۔
حادثے کا شکار ہونے والی نجی بس بیراغڑھ۔تِسّا سڑک پر سفر کر رہی تھی کہ خطرناک پہاڑی موڑ پر بے قابو ہو کر نچلی سڑک پر جا گری۔ یہ تقریباً 27 کلومیٹر طویل دشوار گزار راستہ ہے، جہاں تنگ سڑکیں، خطرناک موڑ اور گہری کھائیاں حادثات کا خطرہ بڑھاتی ہیں۔
چمبا کے پولیس سپرنٹنڈنٹ وجے سکلانی کے مطابق بس میں سوار مسافروں کی مکمل تعداد ابھی معلوم نہیں ہوسکی۔ مقامی افراد نے حادثے کے بعد مسافروں کی چیخیں سن کر فوری طور پر امدادی کارروائی شروع کی اور پولیس کو اطلاع دی۔
حادثے کے بعد ریاستی آفات سے نمٹنے والی فورس، پولیس، ہوم گارڈز، فائر سروس اور محکمہ محصولات کی ٹیمیں موقع پر پہنچ گئیں۔ ملبے میں پھنسے افراد کی تلاش اور زخمیوں کو نکالنے کا کام جاری ہے۔
پولیس نے حادثے کی وجہ معلوم کرنے کے لیے تحقیقات شروع کردی ہیں۔ حکام نے خدشہ ظاہر کیا ہے کہ بس کے ملبے تلے مزید مسافر دبے ہوسکتے ہیں، جس کے باعث ہلاکتوں کی تعداد بڑھنے کا خدشہ ہے۔
پولیس کے مطابق رواں مون سون کے دوران 30 جون سے 7 اگست تک ہماچل پردیش میں سڑک حادثات کے نتیجے میں 78 افراد جان سے جاچکے ہیں۔
