ٹرک سے ٹکرانے کے بعد بس شعلوں کی لپیٹ میں آ گئی، 29 افراد زخمی، ہلاکتوں میں اضافے کا خدشہ
راجستھان کے دوسہ ضلع میں دہلی۔ممبئی ایکسپریس وے پر بدھ کی علی الصبح ایک المناک حادثے میں سلیپر بس ٹرک سے ٹکرا کر آگ کی لپیٹ میں آ گئی، جس کے نتیجے میں کم از کم 8 مسافر جاں بحق جبکہ 29 افراد زخمی ہو گئے۔ زخمیوں میں کئی بچے بھی شامل ہیں، جن میں بعض کی حالت تشویشناک بتائی جا رہی ہے۔
حکام کے مطابق حادثہ صبح تقریباً ساڑھے تین بجے دھناواڑا کے قریب پیش آیا۔ بس ریشی کیش سے اندور جا رہی تھی کہ سامنے چلنے والے ٹرک سے ٹکرا گئی۔ تصادم اتنا شدید تھا کہ بس کا اگلا حصہ مکمل طور پر تباہ ہو گیا اور چند ہی لمحوں میں گاڑی میں آگ بھڑک اٹھی، جس سے کئی مسافر اندر ہی پھنس گئے۔
دوسہ کے پولیس سپرنٹنڈنٹ نے بتایا کہ ابتدائی تحقیقات کے مطابق امکان ہے کہ ڈرائیور کو نیند آ گئی تھی، تاہم حادثے کی اصل وجہ جاننے کے لیے مزید تحقیقات جاری ہیں۔
ریسکیو ٹیموں، فائر بریگیڈ اور مقامی انتظامیہ نے فوری کارروائی کرتے ہوئے آگ پر قابو پایا اور زخمیوں کو دوسہ ضلع اسپتال منتقل کیا۔ حکام کے مطابق کئی افراد اپنی مدد آپ کے تحت بس سے نکلنے میں کامیاب رہے، جبکہ دیگر کو امدادی کارروائی کے دوران باہر نکالا گیا۔
مقامی افراد نے الزام عائد کیا کہ فائر بریگیڈ اطلاع ملنے کے تقریباً ایک گھنٹے بعد موقع پر پہنچی۔ ان کا کہنا ہے کہ اگر امدادی ٹیمیں بروقت پہنچ جاتیں تو مزید قیمتی جانیں بچائی جا سکتی تھیں۔
