ٹرمپ کی دولت میں بڑا اضافہ، کرپٹو کاروبار سے ایک سال میں اربوں ڈالر کی آمدنی
امریکی صدر ڈونلڈ ٹرمپ کے تازہ مالی گوشوارے میں انکشاف ہوا ہے کہ انہوں نے گزشتہ ایک سال کے دوران اپنے کرپٹو کاروبار سے تقریباً ایک اعشاریہ دو ارب ڈالر کی آمدنی حاصل کی، جس کے بعد یہ شعبہ ان کے روایتی جائیداد کے کاروبار سے بھی زیادہ منافع بخش ثابت ہوا۔
رپورٹ کے مطابق ٹرمپ کو ان کی کمپنی ورلڈ لبرٹی فنانشل کی جانب سے جاری کیے گئے کرپٹو ٹوکنز کی فروخت سے پانچ سو ملین ڈالر سے زائد حاصل ہوئے، جبکہ ان کی دوسری کمپنی نے ان کی تصویر والے میم سکے فروخت کرکے چھ سو ملین ڈالر سے زیادہ آمدنی حاصل کی۔ تاہم بعد میں ان دونوں کرپٹو اثاثوں کی قیمتوں میں نمایاں کمی ریکارڈ کی گئی، جس سے متعدد سرمایہ کاروں کو نقصان اٹھانا پڑا۔
مالی گوشوارے کے مطابق ڈونلڈ ٹرمپ نے اپنی شناخت سے منسوب بائبل، جوتے، گھڑیاں اور دیگر مصنوعات کی فروخت سے بھی لاکھوں ڈالر کمائے، جبکہ صرف گھڑیوں کی فروخت سے انہیں تقریباً چار اعشاریہ سات ملین ڈالر حاصل ہوئے۔
رپورٹ میں یہ بھی بتایا گیا ہے کہ متحدہ عرب امارات، سعودی عرب، قطر، رومانیہ اور ویتنام سمیت کئی ممالک میں جائیداد کے منصوبوں سے بھی ٹرمپ کے کاروبار کو کروڑوں ڈالر کی آمدنی ہوئی۔ اسی طرح فلوریڈا میں واقع ان کی معروف رہائش گاہ سے حاصل ہونے والی آمدنی میں بھی نمایاں اضافہ دیکھا گیا۔
ادھر وائٹ ہاؤس نے ایک بار پھر واضح کیا ہے کہ صدر ٹرمپ کے تمام کاروباری معاملات ان کے بیٹے سنبھالتے ہیں اور صدر کے سرکاری فیصلے صرف امریکی عوام کے مفاد میں کیے جاتے ہیں۔
دوسری جانب ناقدین کا کہنا ہے کہ کرپٹو کاروبار، بیرون ملک سرمایہ کاری اور حکومتی پالیسیوں کے درمیان ممکنہ مفادات کے ٹکراؤ پر مزید شفافیت کی ضرورت ہے، جبکہ سرمایہ کاروں کو کرپٹو اثاثوں کی قیمتوں میں شدید اتار چڑھاؤ کا بھی سامنا کرنا پڑا۔
