ایمپائر اسٹیٹ بلڈنگ کی چوٹی پر چڑھ کر منگنی، روسی جوڑے کو پولیس نے گرفتار کر لیا
امریکہ کے مشہور ایمپائر اسٹیٹ بلڈنگ پر غیرقانونی طور پر چڑھ کر منگنی کرنے والے ایک روسی جوڑے کو پولیس نے گرفتار کر لیا۔ اس غیرمعمولی واقعے کی ویڈیو سامنے آنے کے بعد یہ معاملہ سوشل میڈیا پر بھی تیزی سے زیرِ بحث آ گیا۔
رپورٹس کے مطابق ایوان بیرکس اور انجیلا نیکولاؤ عمارت کی تقریباً ایک ہزار چار سو چون چوّن فٹ بلند چوٹی تک پہنچے، جہاں ایوان نے گھٹنے کے بل بیٹھ کر انجیلا کو انگوٹھی پیش کی اور شادی کی پیشکش کی۔ دونوں نے ایک دوسرے کو بوسہ دیا اور تقریباً دس منٹ تک عمارت کی چوٹی پر موجود رہے۔
اس دوران جوڑے نے ایک بڑا بینر بھی لہرایا، جس پر لکھا تھا کہ "جب محبت کی طاقت اقتدار کی محبت پر غالب آ جائے گی تو دنیا امن کو پہچان لے گی۔” اس جملے نے بھی لوگوں کی توجہ اپنی جانب مبذول کرائی۔
زمین پر واپس آنے کے فوراً بعد پولیس نے دونوں کو حراست میں لے لیا۔ حکام کے مطابق ان پر غیرقانونی داخلہ، خطرناک حرکت، عوامی نظم میں خلل، سرکاری املاک کو نقصان پہنچانے اور دیگر الزامات عائد کیے گئے ہیں۔
پولیس کی جانب سے جاری کی گئی باڈی کیم ویڈیو میں اہلکاروں کو جوڑے کو گرفتار کرتے ہوئے دیکھا جا سکتا ہے۔
یہ جوڑا اصل میں روس کے شہر ماسکو سے تعلق رکھتا ہے، تاہم اس وقت امریکہ کی ریاست نیو جرسی میں مقیم ہے۔
