امریکی صدر ڈونلڈ ٹرمپ نے حیدرآباد میں امریکی قونصل خانے سے متصل سڑک کو "ڈونلڈ ٹرمپ ایونیو” کا نام دیے جانے پر بھارت کا شکریہ ادا کیا ہے۔ انہوں نے اس اقدام کو اپنے لیے ایک بڑا اعزاز قرار دیتے ہوئے کہا کہ وہ ایسے پہلے امریکی صدر ہیں جنہیں اس انداز میں خراجِ تحسین پیش کیا گیا ہے۔
ٹرمپ نے اپنے سماجی رابطے کے پلیٹ فارم پر جاری بیان میں کہا کہ "حیدرآباد، بھارت میں نئی ڈونلڈ ٹرمپ ایونیو، اس انداز میں اعزاز حاصل کرنے والا میں پہلا امریکی صدر ہوں، اس پر بھارت کا شکر گزار ہوں۔”
یہ یادگاری تقریب 23 جون کو حیدرآباد میں منعقد ہوئی تھی، جہاں بھارت میں امریکہ کے سفیر سرجیو گور اور تلنگانہ کے نائب وزیر اعلیٰ ملو بھٹی وکرامارکا نے مشترکہ طور پر یادگاری تختی کی نقاب کشائی کی۔ یہ تقریب امریکہ کی ڈھائی سوویں یومِ آزادی کی تقریبات کے سلسلے میں منعقد کی گئی تھی۔
تقریب میں سینئر سفارت کاروں، حکومتی عہدیداروں اور کاروبار، دفاع، خلائی صنعت اور جدید ٹیکنالوجی سے وابستہ شخصیات نے شرکت کی۔ اس موقع پر مقررین نے بھارت اور امریکہ کے درمیان بڑھتے ہوئے اقتصادی، تجارتی اور تزویراتی تعاون کو دونوں ممالک کے تعلقات کے لیے اہم قرار دیا۔
امریکی سفیر سرجیو گور نے کہا کہ حیدرآباد دونوں ممالک کے درمیان تعاون کا ایک مضبوط مرکز بنتا جا رہا ہے۔ انہوں نے شہر کی صنعتی، دفاعی اور جدید ٹیکنالوجی کے شعبوں میں ترقی کو دوطرفہ تعلقات کی مضبوطی کی علامت قرار دیا۔
تلنگانہ حکومت کا کہنا ہے کہ سڑک کو نیا نام دینے کا مقصد امریکہ کے ساتھ دوستانہ تعلقات کو مزید مستحکم کرنا اور حیدرآباد کے بڑھتے ہوئے عالمی کردار کو اجاگر کرنا ہے۔
