آسام میں کوکروچ جنتا پارٹی کے کارکنوں کی حراست کے بعد پارٹی کے بانی ابھیجیت ڈپکے نے وزیر اعلیٰ ہمنتا بسوا سرما کو وارننگ دی ہے۔ انہوں نے کہا کہ اگر پارٹی کے شریک کنوینر آشوتوش رنکا اور دیگر کارکنوں کو رہا نہیں کیا گیا تو وہ پارٹی ارکان کے ساتھ آسام جائیں گے۔
۳۰ سے زائد کارکن حراست میں
کوکروچ جنتا پارٹی کے مطابق اتوار کو گوہاٹی میں علاقائی رضاکاروں کی مجوزہ میٹنگ سے قبل پولیس نے ۳۰ سے زائد کارکنوں کو حراست میں لیا، جن میں مرکزی کمیٹی کے چار ارکان بھی شامل ہیں۔ آشوتوش رنکا بھی حراست میں لیے گئے افراد میں شامل تھے۔
ڈپکے نے دعویٰ کیا کہ رنکا کو آسام پولیس نے ایک نجی رہائش گاہ سے حراست میں لیا اور انہیں اب تک حراست کی وجہ یا الزامات سے آگاہ نہیں کیا گیا۔ انہوں نے کہا کہ اگر رنکا کو رہا نہیں کیا گیا تو وہ دیگر کارکنوں کے ساتھ آسام جائیں گے۔
رنکا نے الزام عائد کیا کہ پولیس صبح سے پارٹی کی میٹنگ روکنے کی کوشش کررہی تھی۔ ان کے مطابق نجی جگہ پر پرامن اجلاس ہورہا تھا، تاہم پولیس نے پارٹی کے ارکان کو حراست میں لینا شروع کردیا۔
میٹنگ کا مقام تبدیل کیا گیا
علاقائی رضاکاروں کی میٹنگ ابتدا میں صبح ۱۰ بجے آسام شری پرشورام سیوا سدن، کھرگا چودھری روڈ، اتگاؤں میں مقرر تھی۔ منتظمین کے مطابق اصل مقام پر دباؤ ڈال کر بکنگ منسوخ کرانے کی کوشش کے بعد میٹنگ کا مقام تبدیل کرکے آسام سکریٹریٹ کے سامنے چودھری ٹیلا کردیا گیا۔
رنکا ہفتہ کو پارٹی ارکان انکیت بھاردواج، آکاش پریم، ورون اگروال اور انام کے ساتھ گوہاٹی پہنچے تھے۔
پارٹی نے رہائی کا مطالبہ کیا
دوسری جانب آسام پولیس کی جانب سے حراست میں لیے گئے افراد کے بارے میں تاحال کوئی بیان جاری نہیں کیا گیا۔
بعد میں کوکروچ جنتا پارٹی نے تمام حراست میں لیے گئے کارکنوں اور رنکا کی فوری اور غیر مشروط رہائی کا مطالبہ کیا۔ پارٹی نے کہا کہ وہ آسام میں اپنی سرگرمیاں جاری رکھے گی، جن میں اسکول ٹھیک کرو تعلیمی مہم اور انتخابی فہرستوں کی خصوصی نظرثانی سے متاثرہ خاندانوں سے رابطہ شامل ہے۔
