مدھیہ پردیش کے ضلع بالگھاٹ میں کاکروچ جنتا پارٹی کے بانی ابھجیت دپکے کو ہفتہ کو سوشل میڈیا سے وابستہ افراد نے گھیر لیا اور دورے کے مقصد پر سوالات کیے۔ دپکے اہل خانہ سے ملاقات کے لیے اڈوری، کورکا اور بونڈاری پہنچے تھے۔ اطلاعات کے مطابق ان علاقوں میں متعدی بیماریوں کے باعث متعدد بچوں کی موت ہوئی ہے۔ وہ وہاں صحت کی سہولتوں کے بارے میں معلومات حاصل کرنے گئے تھے۔
واقعے کی ایک ویڈیو منظر عام پر آئی ہے۔ ویڈیو میں ایک خاتون دپکے کی گاڑی کے قریب پہنچتی ہیں اور سوال کرتی ہیں کہ کیا وہ ’’لاشوں پر سیاست‘‘ کرنے آئے ہیں؟ انہوں نے پوچھا کہ وہ اتنی دیر سے کیوں پہنچے۔ دپکے نے معذرت کی۔ خاتون نے سڑک کی طرف اشارہ کیا۔ ماحول کشیدہ ہوگیا اور دپکے کے کارکن انہیں دوسری گاڑی میں لے گئے۔
یہ واقعہ ایسے وقت پیش آیا ہے جب مدھیہ پردیش ہائی کورٹ نے علاقے میں ۳۰ سے زائد بچوں کی موت کے معاملے پر حکومت سے جواب طلب کیا ہے۔ عدالت نے ناکافی طبی سہولتوں سے متعلق درخواست کی سماعت میں محکمہ صحت، محکمہ خواتین و اطفال کی بہبود، بالگھاٹ ضلع کلکٹر اور دیگر حکام کو نوٹس جاری کیے ہیں۔
درخواست گزار کی رپورٹ میں علاقے میں غیر صحت بخش حالات کا الزام عائد کیا گیا ہے۔ درخواست میں کہا گیا کہ ایک ۵۰ بستروں والے اسپتال میں تقریباً ۴۰۰ بچوں کا علاج کیا جا رہا ہے۔ تنازع کے درمیان دپکے نے ۱۳ اگست ۲۰۲۶ کو طنزیہ استعفیٰ خط جاری کیا۔ انہوں نے بچوں کی اموات کا حوالہ دیتے ہوئے طبی سہولتوں کی کمی پر تنقید کی۔
