اسرائیل اور لبنان نے جاری جنگ بندی میں مزید ۴۵ دن کی توسیع پر اتفاق کرلیا ہے۔ یہ اعلان امریکہ کی جانب سے کیا گیا، تاہم جنگ بندی کے باوجود دونوں جانب سے حملوں کا سلسلہ جاری ہے۔
امریکی حکام کے مطابق دونوں ممالک کے نمائندوں نے واشنگٹن میں مذاکرات کیے، جہاں مستقل سیاسی حل اور سکیورٹی صورتحال پر بات چیت ہوئی۔ امریکہ نے کہا کہ جنگ بندی میں توسیع کا مقصد مزید پیش رفت کے لیے وقت فراہم کرنا ہے۔
لبنان کے وزیر اعظم نواف سلام نے کہا کہ لبنان مزید جنگ اور بیرونی مفادات کی سیاست برداشت نہیں کرسکتا۔ ان کے مطابق حالیہ تنازع نے لبنان کے درجنوں قصبوں اور دیہات کو تباہ کردیا۔
دوسری جانب اسرائیل نے جنوبی لبنان میں نئے فضائی حملے کیے جن میں متعدد افراد ہلاک اور زخمی ہوئے۔ حملوں میں خواتین، بچے اور طبی عملہ بھی متاثر ہوا۔ ایک حملے میں حزب اللہ سے وابستہ طبی مرکز کو نشانہ بنایا گیا۔
حزب اللہ نے بھی اسرائیلی علاقوں پر ڈرون حملوں کا دعویٰ کیا۔ اسرائیلی فوج کے مطابق جھڑپوں میں اس کے کئی فوجی ہلاک ہوئے جبکہ سینکڑوں اہداف کو نشانہ بنایا گیا۔
اقوام متحدہ کے نمائندے عمران رضا نے کہا کہ لبنان میں صورتحال انتہائی تشویشناک ہے اور شہریوں کی ہلاکتیں ناقابل قبول ہیں۔ انہوں نے زور دیا کہ سفارتی کوششوں کے ذریعے فوری طور پر تشدد روکا جائے۔
