برکس اجلاس میں مودی کا توازن، بھارت نے امریکہ اور چین کے درمیان راستے کھلے رکھے
برکس سربراہی اجلاس کے دوران بھارتی وزیراعظم نریندر مودی، روسی صدر ولادیمیر پیوٹن اور چینی صدر شی جن پنگ کا ہاتھ تھامے ہوئے منظر میں نظر آئے۔ یہ تصویر اگرچہ برکس ممالک کے درمیان اتحاد کی علامت دکھائی دی، تاہم اجلاس کے پس پردہ بھارت سمیت رکن ممالک کے درمیان قومی مفادات اور باہمی اختلافات اہم رہے۔
بھارت کے لیے یہ اجلاس ایسے وقت میں مختلف رکن ممالک کے ساتھ تعلقات مضبوط بنانے کا موقع تھا جب عالمی سیاست میں امریکہ اور چین کے درمیان کشیدگی بڑھ رہی ہے۔ نئی دہلی نے ایک طرف چین اور روس سمیت ان ممالک کے رہنماؤں سے رابطے بڑھائے جنہیں مغربی ممالک شکوک کی نگاہ سے دیکھتے ہیں، تو دوسری جانب مغربی دنیا کے ساتھ اپنے تعلقات بھی برقرار رکھے۔
اجلاس میں بھارت نے یکطرفہ محصولات پر تنقید کرنے والے مشترکہ مؤقف کی حمایت کی، جبکہ مشترکہ اعلامیے میں یوکرین کا ذکر شامل نہیں کیا گیا اور غزہ کی صورتحال پر گہری تشویش ظاہر کی گئی۔ تاہم امریکہ اور اسرائیل کا نام اعلامیے میں شامل نہیں تھا۔ مودی نے واضح کیا کہ برکس کسی کے خلاف قائم گروپ نہیں ہے۔
چین سے متعلق امور کے ماہر بسواجیت دھر کے مطابق بھارت نے اجلاس میں اپنی آزاد خارجہ پالیسی کا مؤثر انداز میں اظہار کیا۔ ان کا کہنا تھا کہ بھارت نے ترقی پذیر دنیا میں اپنا کردار دوبارہ مضبوط کیا ہے اور اسے مستقبل میں بھی توازن برقرار رکھنا چاہیے۔
بھارت نے ایرانی صدر مسعود پزشکیان کا بھی پرتپاک استقبال کیا۔ انہوں نے مودی کے ساتھ دوطرفہ مذاکرات کیے اور صدر دروپدی مرمو سے بھی ملاقات کی۔
اجلاس کے موقع پر ایران اور متحدہ عرب امارات کے درمیان بھی رابطے کا موقع فراہم ہوا۔ ایرانی صدر اور ابوظہبی کے ولی عہد شیخ خالد بن محمد بن زاید النہیان نے پہلی مرتبہ بڑھتی ہوئی کشیدگی کے بعد ملاقات کی اور علاقائی استحکام کے لیے تناؤ کم کرنے کی کوششوں کی حمایت کی۔
اسی طرح بھارت کے یوکرین جنگ میں ممکنہ ثالثی کے حوالے سے بھی قیاس آرائیاں جاری ہیں۔ مودی نے دو ہفتوں کے دوران پیوٹن سے دو مرتبہ ملاقات کی اور جنگ ختم کرنے پر زور دیا، جبکہ وزیر خارجہ ایس جے شنکر نے یوکرین کا دورہ کرکے امن کوششوں میں ہر ممکن تعاون کی پیشکش کی۔
