مغربی بنگال میں ترنمول کانگریس کی انتخابی شکست کے بعد ممتا بنرجی کی حکومت سے وابستہ مشیروں کے استعفوں کا سلسلہ شروع ہو گیا ہے، جس سے ریاست کی سیاست میں ہلچل مچ گئی ہے۔
رپورٹس کے مطابق، معروف ماہرِ معاشیات ابھیروپ سرکار نے اپنی ذمہ داریوں سے استعفیٰ دے دیا ہے۔ وہ مغربی بنگال صنعتی ترقی کارپوریشن اور چھوٹی صنعتوں کے ادارے کے سربراہ بھی تھے۔ اس کے علاوہ سابق اعلیٰ بیوروکریٹس الاپن بندوپادھیائے اور ایچ کے دویدی نے بھی مشیر کے عہدوں سے استعفیٰ پیش کر دیا ہے۔
ذرائع کے مطابق مزید اہم شخصیات کے استعفوں کا بھی امکان ظاہر کیا جا رہا ہے، جس سے صورتحال مزید پیچیدہ ہو سکتی ہے۔ اس سے قبل ریاست کے سابق ایڈووکیٹ جنرل نے بھی اپنے عہدے سے علیحدگی اختیار کر لی تھی۔
دوسری جانب، ممتا بنرجی نے اپنی شکست کو عوامی مینڈیٹ تسلیم کرنے سے انکار کرتے ہوئے دعویٰ کیا ہے کہ متعدد نشستیں "چھین لی گئیں”۔ انہوں نے یہ بھی کہا کہ وہ فوری طور پر اپنا استعفیٰ گورنر کو پیش نہیں کریں گی۔
ماہرین کے مطابق، حالیہ استعفے ریاستی سیاست میں ایک نئے مرحلے کا آغاز ثابت ہو سکتے ہیں۔
