اسرائیلی وزیرِ اعظم بنیامن نیتن یاہو نے کہا ہے کہ ایران کے معاملے پر اسرائیل اور امریکہ کے درمیان مکمل رابطہ اور ہم آہنگی موجود ہے، جبکہ دونوں ممالک ہر ممکن صورتحال سے نمٹنے کے لیے تیار ہیں۔
نیتن یاہو نے میڈیا سے گفتگو کرتے ہوئے بتایا کہ ان کی امریکی صدر ڈونلڈ ٹرمپ سے تقریباً روزانہ بات چیت ہوتی ہے اور دونوں ممالک کے حکام مسلسل رابطے میں ہیں۔ انہوں نے کہا کہ ایران کے خلاف حکمتِ عملی پر دونوں ممالک کے مقاصد ایک جیسے ہیں، جن میں سب سے اہم مقصد ایران کے جوہری مواد کو ختم کرنا ہے۔
ادھر امریکی صدر ٹرمپ نے ایران کو ایک بار پھر سخت وارننگ دیتے ہوئے کہا کہ اگر تہران نے معاہدہ قبول نہ کیا تو پہلے سے زیادہ شدت کے ساتھ حملے کیے جا سکتے ہیں۔ تاہم انہوں نے یہ بھی دعویٰ کیا کہ حالیہ مذاکرات میں پیش رفت ہوئی ہے اور جلد کسی معاہدے کا امکان موجود ہے۔
ٹرمپ نے واضح کیا کہ امریکہ کسی صورت ایران کو جوہری ہتھیار حاصل کرنے کی اجازت نہیں دے گا۔ انہوں نے یہ دعویٰ بھی کیا کہ حالیہ تنازع کے دوران ایران کی بحری، فضائی اور میزائل صلاحیتوں کو شدید نقصان پہنچا ہے۔
ماہرین کے مطابق، اگر سفارتی کوششیں ناکام ہوئیں تو مشرقِ وسطیٰ میں کشیدگی مزید بڑھ سکتی ہے، جس کے اثرات عالمی امن اور تیل کی منڈی پر بھی پڑ سکتے ہیں۔
