نیٹ پرچہ لیک معاملے کے خلاف ملک گیر احتجاجی مہم کے تحت آج حیدرآباد میں بھی احتجاجی مظاہرہ منعقد کیا جا رہا ہے۔ یہ احتجاج صبح دس بجے دھرنا چوک میں شروع ہوگا، جس میں طلبہ، سماجی کارکنان اور مختلف تنظیموں کے نمائندے شرکت کریں گے۔
یہ مہم ملک کے مختلف شہروں میں گیارہ جون سے بیس جون تک جاری رہے گی۔ اس سلسلے میں پونے، لکھنؤ، امرتسر، بنگلورو، جے پور، دہلی اور دیگر شہروں میں بھی احتجاجی پروگرام رکھے گئے ہیں۔
شہری کارکنان وجے مالنگی، روچت آشا کمل اور سوندے انصار نے میڈیا سے گفتگو کرتے ہوئے کہا کہ احتجاج کا مقصد امتحانی نظام میں شفافیت کو یقینی بنانا اور حالیہ پرچہ لیک واقعات کے ذمہ داروں کے خلاف سخت کارروائی کا مطالبہ کرنا ہے۔
مظاہرین نے مرکزی وزیر تعلیم کے استعفے کا مطالبہ بھی کیا ہے۔ ان کا کہنا ہے کہ پرچہ لیک جیسے واقعات نے لاکھوں طلبہ کے مستقبل کو متاثر کیا ہے اور امتحانی نظام پر عوامی اعتماد کو نقصان پہنچایا ہے۔
تنظیم کے بانی نے بتایا کہ ان کے تعلیمی منشور میں پرچہ لیک کی روک تھام، امتحانی نتائج کے بروقت اعلان، بھرتی اور داخلہ امتحانات میں شفافیت، امتحانی اداروں کی جوابدہی اور طلبہ کو درپیش مسائل کے حل پر خصوصی توجہ دی گئی ہے۔
