لبنان اور اسرائیل کے درمیان جنگ بندی کی مدت ختم ہونے کے قریب ہے، ایسے میں دونوں ممالک کے نمائندے امریکہ میں نئے امن مذاکرات کے لیے واشنگٹن پہنچ گئے ہیں۔ یہ مذاکرات ایسے وقت ہورہے ہیں جب اسرائیلی حملوں میں سینکڑوں افراد ہلاک ہوچکے ہیں۔
رپورٹس کے مطابق مارچ سے جاری اسرائیلی حملوں میں اب تک ۲۸۰۰ سے زائد افراد جان گنوا چکے ہیں جن میں کم از کم ۲۰۰ بچے شامل ہیں۔ لبنان کا کہنا ہے کہ جنگ بندی کے باوجود اسرائیلی حملے مسلسل جاری ہیں۔
امریکی صدر ڈونلڈ ٹرمپ نے پہلے امید ظاہر کی تھی کہ جنگ بندی کے دوران اسرائیلی وزیر اعظم بنیامین نیتن یاہو اور لبنانی صدر جوزف عون کی تاریخی ملاقات ہوگی، تاہم یہ ملاقات نہ ہوسکی۔
لبنانی حکام کا کہنا ہے کہ سب سے پہلے حملے بند ہونا اور مستقل جنگ بندی ضروری ہے۔ دوسری جانب اسرائیل نے واضح کیا ہے کہ وہ حزب اللہ کے خلاف کارروائیاں جاری رکھے گا۔
امریکہ نے لبنان کی خودمختاری کی حمایت کی ہے لیکن ساتھ ہی حزب اللہ کو غیر مسلح کرنے پر بھی زور دیا ہے۔ واشنگٹن میں جاری یہ مذاکرات خطے میں امن کے لیے انتہائی اہم سمجھے جارہے ہیں۔
