حیدرآباد میں حالیہ شدید بارشوں کے دوران پیدا ہونے والی ٹریفک جام، پانی جمع ہونے اور بجلی کی بندش کی صورتحال پر وزیراعلیٰ اے ریونت ریڈی نے سخت ناراضگی کا اظہار کرتے ہوئے متعلقہ افسران کے خلاف کارروائی کا حکم دیا ہے۔
وزیراعلیٰ نے پولیس کے سربراہ سی وی آنند کو ہدایت دی کہ بارش کے دوران مناسب رابطہ اور انتظامات نہ کرنے والے افسران کے خلاف فوری اور سخت کارروائی کی جائے۔ انہوں نے واضح کیا کہ آئندہ ایسی صورتحال ہرگز برداشت نہیں کی جائے گی۔
جائزہ اجلاس کے دوران وزیراعلیٰ نے کہا کہ محکمہ موسمیات کی جانب سے پہلے ہی بارش کی وارننگ جاری کی گئی تھی، لیکن بلدیاتی اداروں، ٹریفک پولیس، واٹر بورڈ اور دیگر محکموں کے درمیان مؤثر ہم آہنگی نظر نہیں آئی۔ اس غفلت کے باعث شہریوں کو شدید مشکلات کا سامنا کرنا پڑا۔
انہوں نے کہا کہ مختلف علاقوں میں نالوں اور نکاسی آب کے راستوں میں کچرا جمع ہونے سے پانی کی روانی متاثر ہوئی، جس کے نتیجے میں کئی مقامات پر پانی کھڑا ہوگیا اور ٹریفک نظام درہم برہم ہوگیا۔
اجلاس میں بجلی کی طویل بندش، درخت گرنے کے واقعات، آب رسانی، صحت عامہ اور آبپاشی منصوبوں کا بھی جائزہ لیا گیا۔ وزیراعلیٰ نے متعلقہ محکموں کو ہدایت دی کہ بارشوں کے موسم میں شہریوں کو درپیش مشکلات کم کرنے کے لیے فوری اور مؤثر اقدامات کیے جائیں۔
انہوں نے متعلقہ افسران کو مسلسل نگرانی، بہتر رابطہ کاری اور عوامی سہولت کو یقینی بنانے کی بھی ہدایت دی۔
