امریکہ کے صدر ڈونلڈ ٹرمپ نے ایران کے ساتھ جاری جنگ بندی میں توسیع کا اعلان کرتے ہوئے بحری ناکہ بندی برقرار رکھنے کا فیصلہ کیا ہے، جس سے خطے میں کشیدگی برقرار ہے۔
امریکی صدر کے مطابق ایران کو مذاکرات آگے بڑھانے کے لیے ایک متفقہ تجویز پیش کرنا ہوگی، جس کے بعد ہی بات چیت ممکن ہو سکے گی۔ انہوں نے کہا کہ ایران کے اندرونی اختلافات کے باعث مذاکرات میں پیش رفت نہیں ہو پا رہی۔
یہ اعلان اس وقت سامنے آیا جب دو ہفتوں کی جنگ بندی ختم ہونے والی تھی، جس کے باعث آئندہ امن مذاکرات کے حوالے سے غیر یقینی صورتحال پیدا ہو گئی ہے۔ اسی دوران امریکی نائب صدر نے پاکستان کے دورے کو بھی مؤخر کر دیا، جہاں مذاکرات کا اگلا مرحلہ متوقع تھا۔
دوسری جانب ایران نے واضح کیا ہے کہ وہ ناکابندی کے خاتمے کے بغیر مذاکرات میں شامل نہیں ہوگا۔ ایرانی وزیر خارجہ نے اس اقدام کو جنگ بندی کی خلاف ورزی قرار دیتے ہوئے کہا کہ بندرگاہوں کی ناکہ بندی دراصل ایک جنگی اقدام ہے۔
پاکستان نے جنگ بندی میں توسیع کا خیر مقدم کیا اور اسے سفارتی کوششوں کے لیے مثبت قدم قرار دیا۔
آبنائے ہرمز میں جاری کشیدگی عالمی توانائی کی ترسیل کو متاثر کر سکتی ہے، جس کے اثرات عالمی معیشت پر پڑنے کا خدشہ ہے۔
