امریکی صدر ڈونلڈ ٹرمپ نے کہا ہے کہ انہیں ایران کی جانب سے آج رات ایک اہم پیغام موصول ہونے کی توقع ہے، جبکہ انہوں نے روس اور یوکرین کے درمیان جاری محدود جنگ بندی میں توسیع کی امید بھی ظاہر کی۔
وائٹ ہاؤس سے روانگی سے قبل صحافیوں سے گفتگو کرتے ہوئے ٹرمپ نے کہا کہ ایران کے ساتھ جاری جوہری مذاکرات کے حوالے سے جلد صورتحال واضح ہوجائے گی۔ ان کا کہنا تھا کہ اگر معاملات طے نہ پائے تو امریکہ مختلف راستہ اختیار کرسکتا ہے۔
ٹرمپ نے خبردار کیا کہ اگر مذاکرات ناکام ہوئے تو واشنگٹن مزید سخت حکمت عملی اپنا سکتا ہے۔ انہوں نے “پروجیکٹ فریڈم پلس” کا ذکر کرتے ہوئے اشارہ دیا کہ امریکہ اضافی اقدامات پر غور کرسکتا ہے۔
روس یوکرین جنگ کے حوالے سے امریکی صدر نے اسے دوسری عالمی جنگ کے بعد بدترین تنازع قرار دیا۔ انہوں نے کہا کہ اگر موجودہ مختصر جنگ بندی میں توسیع ہوتی ہے تو یہ خوش آئند ہوگا کیونکہ دنیا کو امن کی ضرورت ہے۔
صدر ٹرمپ نے امریکی معیشت پر بھی اطمینان کا اظہار کرتے ہوئے دعویٰ کیا کہ ملک میں روزگار کے مواقع تاریخی سطح پر پہنچ چکے ہیں۔ ان کے مطابق حالیہ روزگار کے اعداد و شمار انتہائی مثبت رہے۔
صحت کے معاملے پر ٹرمپ نے وائرس کے پھیلاؤ سے متعلق خدشات کو کم کرتے ہوئے کہا کہ حکام صورتحال پر گہری نظر رکھے ہوئے ہیں اور حالات قابو میں ہیں۔
