کریم نگر کے مصروف علاقے جیوتی نگر میں واقع ایک معروف جیولری شاپ میں دن دہاڑے مسلح ڈکیتی کی واردات نے علاقے میں شدید خوف و ہراس پھیلا دیا۔ اطلاعات کے مطابق، پانچ مسلح ملزمان گاہک بن کر دکان میں داخل ہوئے اور اچانک فائرنگ شروع کر دی۔
دکاندار اور عملے کو یرغمال بنا کر انہیں ایک جگہ بٹھایا گیا، ہاتھ باندھ دیے گئے اور منہ پر ٹیپ لگا دی گئی۔ اس دوران دکان کے انچارج نے مزاحمت کی کوشش کی تو ملزمان نے ان پر گولی چلا دی جس سے وہ شدید زخمی ہو گئے۔ دیگر ملازمین بھی فائرنگ سے زخمی ہوئے۔
ملزمان نے قیمتی زیورات لوٹنے کے بعد فرار ہونے کی کوشش کی۔ اطلاعات کے مطابق، وہ تین بیگز میں زیورات بھر رہے تھے مگر جلد بازی میں دو بیگز وہیں چھوڑ گئے اور ایک بیگ لے کر موٹر سائیکلوں پر فرار ہو گئے۔
پولیس نے واقعے کے بعد فوری کارروائی کرتے ہوئے علاقے میں ہائی الرٹ نافذ کر دیا ہے اور آٹھ خصوصی ٹیمیں تشکیل دے کر ملزمان کی تلاش شروع کر دی ہے۔ سی سی ٹی وی فوٹیج کی مدد سے ملزمان کی شناخت کی جا رہی ہے۔
حکام نے عوام سے اپیل کی ہے کہ اگر کسی کو مشتبہ افراد کے بارے میں معلومات ہوں تو فوری اطلاع دیں۔ اطلاع دینے والے کے لیے ایک لاکھ روپے انعام کا اعلان بھی کیا گیا ہے۔
