امریکی صدر ڈونلڈ ٹرمپ نے ایران کے خلاف ممکنہ فوجی کارروائی کے حوالے سے اہم فیصلہ کرتے ہوئے اعلان کیا ہے کہ فی الحال ایران پر مجوزہ حملے کا منصوبہ روک دیا گیا ہے۔ ان کے مطابق ایران اور مغربی ایشیا کے دیگر ممالک نے مجوزہ معاہدے کو حتمی شکل دینے کے لیے مزید وقت طلب کیا ہے، جس میں آبنائے ہرمز کی مکمل بحالی اور ایرانی جوہری خطرے کے خاتمے سے متعلق نکات شامل ہیں۔
ڈونلڈ ٹرمپ نے کہا کہ امریکہ نے عالمی امن اور خطے کے استحکام کو مدنظر رکھتے ہوئے عارضی طور پر فوجی کارروائی روکنے کا فیصلہ کیا ہے، تاہم اگر معاہدہ جلد مکمل نہ ہوا تو امریکہ دوبارہ کارروائی پر غور کرے گا۔
ٹرمپ کے مطابق امریکہ کے پاس ایسی فوجی طاقت موجود ہے جو دوسری عالمی جنگ کے بعد دیکھی نہیں گئی، لیکن موجودہ حالات میں معاہدے کو موقع دینا زیادہ مناسب سمجھا گیا ہے۔ انہوں نے یہ بھی دعویٰ کیا کہ اسرائیلی وزیر اعظم بنیامن نیتن یاہو بھی جنگ کے خاتمے اور ایران کے ساتھ معاہدے پر آمادہ ہیں۔
ایرانی حکام نے دھمکی دی ہے کہ حملے کی صورت میں سعودی عرب اور متحدہ عرب امارات کے تیل کے ذخائر، جبکہ قطر اور اسرائیل کے گیس مراکز کو نشانہ بنایا جا سکتا ہے۔
بین الاقوامی ذرائع کے مطابق قطر اور پاکستان بھی امریکہ اور ایران کے نمائندوں کے ساتھ الگ الگ سطح پر مذاکرات میں مصروف ہیں تاکہ مجوزہ معاہدے کو حتمی شکل دے کر خطے میں کشیدگی کم کی جا سکے۔
