کیف: روس نے ایک بار پھر یوکرین کے دارالحکومت کیف پر بڑے پیمانے پر بیلسٹک میزائلوں اور ڈرونز سے حملہ کیا، جس کے نتیجے میں 9 افراد ہلاک جبکہ 22 افراد زخمی ہو گئے۔ حملہ جمعہ اور ہفتہ کی درمیانی شب کیا گیا، جس کے بعد شہر کے مختلف علاقوں میں خوف و ہراس پھیل گیا۔
اطلاعات کے مطابق سولومیانسکی ضلع میں واقع ایک پانچ منزلہ رہائشی عمارت شدید حملے کی زد میں آ گئی، جس کے باعث عمارت کو بھاری نقصان پہنچا۔ امدادی ٹیموں نے بروقت کارروائی کرتے ہوئے 35 افراد کو محفوظ مقام پر منتقل کیا۔
دوسری جانب دارنیتسکی ضلع میں بھی شدید حملہ کیا گیا، جہاں 7 افراد ہلاک اور 14 افراد زخمی ہوئے۔ حملے کے باعث کئی مکانات منہدم ہو گئے جبکہ متعدد گھروں میں آگ بھڑک اٹھی۔ امدادی اہلکار ملبے تلے دبے افراد کو نکالنے میں مصروف ہیں، جبکہ زخمیوں کو قریبی اسپتالوں میں منتقل کر دیا گیا ہے۔
دوسری جانب یوکرینی حکام نے حملے کو شہری آبادی پر بڑا حملہ قرار دیتے ہوئے ہلاکتوں میں اضافے کا خدشہ ظاہر کیا ہے۔ متاثرہ علاقوں میں امدادی کارروائیاں تیزی سے جاری ہیں جبکہ کئی عمارتوں کو شدید نقصان پہنچنے کی اطلاعات ہیں۔
روس اور یوکرین کے درمیان جاری جنگ کے دوران دارالحکومت کیف پر یہ تازہ حملہ ایک بار پھر خطے میں کشیدگی میں اضافے کا باعث بن گیا ہے۔
