بھارت کی معروف سیاسی رہنما سونیا گاندھی کی طویل عرصے سے منتظر یادداشتوں کی کتاب اب ہارپرکولنز انڈیا شائع کرے گا۔ ناشر نے اعلان کیا ہے کہ کتاب ۱۰ نومبر ۲۰۲۶ کو بھارت میں شائع کی جائے گی۔
ہارپرکولنز انڈیا نے اپنے اعلان میں کہا کہ ’’بیلونگ: اے جرنی آف لو‘‘ سونیا گاندھی کی محبت، شناخت، ذمہ داری اور وابستگی سے متعلق ایک ذاتی اور اہم داستان ہے۔ ناشر کے مطابق کتاب میں بھارت کے سفر کو ایک اندرونی نقطۂ نظر سے پیش کیا گیا ہے اور یہ موجودہ دور کی سب سے زیادہ متوقع سیاسی یادداشتوں میں شامل ہے۔
پینگوئن سے معاہدہ ختم
یہ اعلان ایسے وقت میں سامنے آیا ہے جب ایک ہفتہ قبل پینگوئن رینڈم ہاؤس انڈیا کے ساتھ کتاب کی اشاعت کا معاملہ آگے نہیں بڑھ سکا تھا۔ بعض رپورٹس میں کہا گیا تھا کہ ناشر اور مصنفہ کے درمیان کتاب کے کچھ حصوں میں تدوینی تبدیلیوں اور حذف کیے جانے والے مواد پر اختلافات پیدا ہوئے تھے۔
تاہم پینگوئن نے ۲۸ اگست کو جاری بیان میں کہا کہ وہ بھارت میں کتاب کا ناشر نہیں ہے۔ ادارے نے اس تاثر کی بھی تردید کی کہ مصنفہ کی جانب سے تدوینی تبدیلیاں قبول نہ کرنے کی وجہ سے اس نے کتاب شائع کرنے سے انکار کیا۔ ادارے کے مطابق کتاب کی جانچ اور مصنفین کو تجاویز دینا اشاعتی عمل کا معمول کا حصہ ہے اور وہ کتاب شائع کرنے کے لیے تیار اور خواہش مند تھا۔
متنازع حوالوں پر اختلاف
انڈین ایکسپریس اور ہندوستان ٹائمز کی رپورٹس کے مطابق پینگوئن نے کتاب کے ایک حصے میں مخصوص تدوینی تبدیلیاں اور کچھ مواد حذف کرنے کی تجویز دی تھی۔
رپورٹس میں دعویٰ کیا گیا کہ سونیا گاندھی نے چین کی جانب سے بھارتی سرحدوں میں مبینہ دراندازی، وزیراعظم نریندر مودی اور راشٹریہ سویم سیوک سنگھ سے متعلق حوالوں میں تبدیلی یا حذف سے اتفاق نہیں کیا۔
سونیا گاندھی کا مؤقف بتایا گیا کہ یہ ان کی اپنی زندگی کی کہانی ہے اور اسے بیان کرنے کے انداز میں کسی تحریف کی اجازت نہیں دی جاسکتی۔ کتاب میں نریندر مودی سے ان کی ملاقاتوں اور ۲۰۰۴ء میں گجرات کی ایک عوامی ریلی میں ان کے خلاف کیے گئے ایک متنازع تبصرے کا بھی ذکر ہے۔
