آبنائے ہرمز میں کشیدگی ایک بار پھر خطرناک حد تک بڑھ گئی ہے، جہاں متحدہ عرب امارات کے دو آئل ٹینکروں پر مبینہ ایرانی کروز میزائلوں سے حملہ کیا گیا۔ اس حملے میں ایک بھارتی عملے کا رکن جاں بحق جبکہ چھ بھارتی شہری زخمی ہو گئے۔
متحدہ عرب امارات کی وزارت دفاع کے مطابق حملہ عمانی سمندری حدود میں واقع آبنائے ہرمز کی جنوبی شپنگ لائن میں پیش آیا، جہاں مومباسا اور البہیہ نامی قومی ٹینکر گزر رہے تھے۔ وزارت دفاع نے بتایا کہ دونوں جہازوں کو دو ایرانی کروز میزائلوں نے نشانہ بنایا، جس کے نتیجے میں آگ بھڑک اٹھی اور جہازوں کو مادی نقصان پہنچا۔
حملے میں مجموعی طور پر آٹھ افراد زخمی ہوئے، جن میں چھ بھارتی شہری اور دو یوکرینی شہری شامل ہیں۔ زخمیوں میں سے چار کی حالت تشویشناک بتائی گئی ہے۔ اماراتی حکام نے بتایا کہ جہازوں پر لگی آگ پر قابو پا لیا گیا ہے۔
متحدہ عرب امارات نے اس حملے کو بین الاقوامی قانون کی سنگین خلاف ورزی قرار دیتے ہوئے کہا ہے کہ اسے اپنے قومی مفادات اور سلامتی کے تحفظ کے لیے مناسب جواب دینے کا حق محفوظ ہے۔ وزارت خارجہ نے بھی حملے کی سخت الفاظ میں مذمت کرتے ہوئے بھارت کے ساتھ اظہار تعزیت کیا اور زخمیوں کی جلد صحت یابی کی دعا کی۔
اس واقعے کے بعد خطے میں امریکہ اور ایران کے درمیان کشیدگی مزید بڑھ گئی ہے۔ امریکی حکام نے ایرانی بندرگاہوں کے لیے بحری ناکہ بندی سخت کرنے کا اعلان کیا ہے، جبکہ عالمی برادری نے آبنائے ہرمز میں آزادانہ جہاز رانی کی بحالی اور فوری کشیدگی کم کرنے پر زور دیا ہے۔
