تلنگانہ ترقی کے لیے مرکز کا تعاون ضروری، ریونت ریڈی کی ارکانِ پارلیمنٹ سے اپیل
تلنگانہ کے وزیراعلیٰ اے ریونت ریڈی نے ریاست کے تمام ارکانِ پارلیمنٹ سے اپیل کی ہے کہ وہ سیاسی اختلافات سے بالاتر ہو کر ریاست کی ترقی کے لیے متحد ہو جائیں اور اہم منصوبوں کے لیے مرکزی حکومت سے منظوری اور مالی تعاون حاصل کرنے میں اپنا کردار ادا کریں۔
پرجا بھون میں منعقدہ اجلاس سے خطاب کرتے ہوئے وزیراعلیٰ نے کہا کہ تلنگانہ کی ترقی سیاست سے بالاتر ہونی چاہیے۔ انہوں نے خاص طور پر بھارتیہ جنتا پارٹی کے ارکانِ پارلیمنٹ سے کہا کہ وہ ریاست کے زیر التوا منصوبوں کی منظوری اور فنڈز کے حصول کے لیے فعال کردار ادا کریں۔
ریونت ریڈی نے حیدرآباد میں انڈین انسٹی ٹیوٹ آف مینجمنٹ کے قیام، حیدرآباد میٹرو کی توسیع اور اس کے لیے قرض کی جلد منظوری کی ضرورت پر زور دیا تاکہ منصوبہ تیزی سے مکمل ہو سکے۔
انہوں نے بتایا کہ علاقائی رنگ روڈ کے لیے زمین کے حصول کا زیادہ تر کام مکمل ہو چکا ہے، اب اس منصوبے کی تکمیل کے لیے مرکز سے مالی تعاون درکار ہے۔ وزیراعلیٰ نے موسیٰ دریا کی بحالی کے منصوبے کے لیے بھی مرکزی منظوری اور خصوصی فنڈ فراہم کرنے کی درخواست کی۔
آبپاشی منصوبوں کا ذکر کرتے ہوئے انہوں نے کہا کہ دندی منصوبہ اور پالامورو۔رنگا ریڈی لفٹ آبپاشی منصوبہ کے لیے درکار عدم اعتراض سرٹیفکیٹ کا معاملہ زیر غور ہے، جس میں مرکز کو مثبت کردار ادا کرنا چاہیے تاکہ منصوبے جلد مکمل ہو سکیں۔
وزیراعلیٰ نے کہا کہ اگر مرکزی حکومت تلنگانہ کے ترقیاتی منصوبوں میں تعاون کرے گی تو ریاستی حکومت اس کا کھلے دل سے اعتراف کرے گی۔ اجلاس میں نائب وزیراعلیٰ، وزراء اور مختلف جماعتوں کے متعدد ارکانِ پارلیمنٹ نے شرکت کی۔
