مرکزی حکومت نے گھریلو ایل پی جی صارفین کے لیے بائیومیٹرک آدھار تصدیق سے متعلق اہم فیصلہ کیا ہے۔ پٹرولیم اور قدرتی گیس کی وزارت کے مطابق یکم اکتوبر ۲۰۲۶ سے رعایتی قیمت پر گیس سلنڈر کی بکنگ اور سبسڈی حاصل کرنے کے لیے بائیومیٹرک آدھار تصدیق مکمل کرنا ضروری ہوگا۔ حکومت نے صارفین سے مقررہ تاریخ سے پہلے یہ عمل مکمل کرنے کی اپیل کی ہے۔
سبسڈی کے لیے تصدیق ضروری
وزارت کے مطابق جن صارفین نے پہلے ہی بائیومیٹرک آدھار تصدیق مکمل کرلی ہے، انہیں دوبارہ کوئی کارروائی کرنے کی ضرورت نہیں ہوگی۔ ایسے صارفین کو پہلے کی طرح رعایتی قیمت پر گیس کی فراہمی جاری رہے گی۔
جن صارفین نے تصدیق مکمل نہیں کی، ان کے لیے تصدیق مکمل ہونے کے بعد ہی رعایتی قیمت پر گیس کی بکنگ کی سہولت دستیاب ہوگی۔ تاہم، جو صارف بائیومیٹرک تصدیق مکمل نہیں کرنا چاہتے یا ایسا کرنے سے قاصر ہیں، وہ مقررہ طریقہ کار کے تحت گیس حاصل کرسکتے ہیں، لیکن انہیں سبسڈی کے بغیر مارکیٹ قیمت ادا کرنا ہوگی۔
کروڑوں صارفین کی تصدیق مکمل
وزارت کے مطابق ۱۹ ستمبر ۲۰۲۶ تک ملک کے ۲۷.۴۳ کروڑ فعال گھریلو ایل پی جی صارفین بائیومیٹرک آدھار تصدیق مکمل کرچکے ہیں، جو مجموعی صارفین کا تقریباً ۸۹.۹ فیصد ہے۔ حکومت کا کہنا ہے کہ اس عمل سے حقیقی صارفین تک سبسڈی پہنچانے، جعلی یا اضافی کنکشن کی نشاندہی اور سبسڈی کے غلط استعمال کو روکنے میں مدد ملے گی۔
حکومت نے صارفین کو پہلے ۳۰ جون ۲۰۲۶ تک تصدیق مکمل کرنے کی ہدایت دی تھی، تاہم بعد میں کئی مرتبہ مہلت بڑھائی گئی اور آخری تاریخ ۱۴ ستمبر ۲۰۲۶ مقرر کی گئی۔
تصدیق مکمل کرنے کے طریقے
صارفین گیس سلنڈر کی ترسیل کے وقت ڈیلیوری اہلکار کے ذریعے بائیومیٹرک تصدیق مکمل کراسکتے ہیں۔ اس کے علاوہ قریبی گیس تقسیم کار کے مرکز پر جاکر بھی یہ عمل مکمل کیا جاسکتا ہے۔ متعلقہ کمپنیوں کی موبائل ایپلی کیشنز کے ذریعے گھر بیٹھے تصدیق کی سہولت بھی دستیاب ہے۔
حکومت نے واضح کیا ہے کہ بائیومیٹرک تصدیق کے لیے صارفین سے کوئی فیس وصول نہیں کی جاتی۔ کسی بھی مدد یا شکایت کے لیے صارفین ۱۸۰۰ ۲۳۳۳ ۵۵۵ پر رابطہ کرسکتے ہیں۔
