چارمینار میں ایس آئی آر کے دوران 23 ہزار مسلم نام والے ووٹر غیر حاضر درج
حیدرآباد کے چارمینار اسمبلی حلقے میں خصوصی نظرثانی کے دوران حذف کیے گئے ووٹروں کے ناموں میں ایک نمایاں تعداد ایسے افراد کی ہے جو رجسٹرڈ پتے پر موجود نہیں ملے۔ ایک تجزیے کے مطابق چارمینار کے مسودہ انتخابی فہرست سے نکالے گئے 94,174 ووٹروں میں تقریباً 36,086 افراد کو ’’غیر حاضر‘‘ درج کیا گیا، جن میں اندازاً 23 ہزار افراد کے نام مسلم ہیں۔
چارمینار پورے حیدرآباد کے 15 اسمبلی حلقوں میں حذف کیے گئے ناموں کے اعتبار سے سب سے کم متاثرہ حلقہ رہا۔ اس کے مقابلے میں جوبلی ہلز میں تقریباً 1.79 لاکھ اور پڑوسی یاقوت پورہ میں 1.55 لاکھ ووٹروں کے نام مسودہ فہرست سے خارج کیے گئے۔
چارمینار میں ’’غیر حاضر‘‘ افراد کی تعداد زیادہ
انتخابی اعداد و شمار کے مطابق حیدرآباد میں حذف کیے گئے تقریباً ہر دس میں سے سات ناموں کے سامنے وجہ ’’منتقل‘‘ درج کی گئی، یعنی ووٹر مستقل طور پر درج پتے سے دوسری جگہ منتقل ہوچکا تھا۔ تاہم چارمینار میں یہ وجہ نصف سے بھی کم کیسز میں سامنے آئی۔
اس کے برعکس ’’غیر حاضر‘‘ کی تعداد چارمینار میں خاصی زیادہ رہی۔ اس کا مطلب ہے کہ بوتھ لیول افسر کو تصدیق کے دوران ووٹر اپنے درج پتے پر موجود نہیں ملا۔ چارمینار میں حذف کیے گئے ممکنہ ووٹروں میں تقریباً 38 فیصد کو اسی زمرے میں رکھا گیا۔
مسلم نام والے ووٹروں کی بڑی تعداد
مجموعی طور پر چارمینار کے مسودہ انتخابی فہرست سے خارج کیے گئے تقریباً 59 ہزار ووٹروں کے نام مسلم بتائے گئے، جو کل حذف شدہ ناموں کا تقریباً 63 فیصد بنتے ہیں۔
اس تناسب میں چارمینار سے زیادہ شرح صرف بہادرپورہ میں 86 فیصد اور چندرائن گٹہ میں 72 فیصد ریکارڈ کی گئی۔
