وینزویلا میں گزشتہ ماہ آنے والے دو طاقتور زلزلوں سے ہلاک ہونے والوں کی تعداد 5 ہزار سے تجاوز کر گئی ہے۔ حکام کے مطابق 24 جون کو صرف ایک منٹ کے وقفے سے آنے والے 7.2 اور 7.5 شدت کے زلزلوں نے ملک کے ساحلی صوبے لا گوائیرا میں شدید تباہی مچائی۔
قومی اسمبلی کے سربراہ جارج روڈریگیز نے بتایا کہ اب تک 5,069 افراد جان کی بازی ہار چکے ہیں، جبکہ سب سے زیادہ جانی نقصان ساحلی علاقوں میں ہوا۔ انہوں نے کہا کہ زخمیوں کی تعداد 16,740 برقرار ہے، جن میں سے بیشتر افراد علاج کے بعد اسپتالوں سے واپس جا چکے ہیں۔
دوسری جانب قائم مقام صدر ڈیلسی روڈریگیز نے اعلان کیا کہ زلزلے سے متاثرہ علاقوں کی تعمیرِ نو کے لیے بین الاقوامی مالیاتی فنڈ سے 346 ملین ڈالر حاصل کیے جائیں گے تاکہ بنیادی ڈھانچے کی بحالی کا عمل تیز کیا جا سکے۔
ماہرین کا کہنا ہے کہ زلزلے کے بعد امدادی سرگرمیاں جاری ہیں، تاہم متاثرہ علاقوں کی مکمل بحالی میں کافی وقت لگ سکتا ہے۔ حکومت نے عالمی برادری سے بھی امداد اور تعاون کی اپیل کی ہے تاکہ متاثرہ خاندانوں کی جلد از جلد بحالی ممکن بنائی جا سکے۔
