تلنگانہ حکومت نے کالیشورم لفٹ آبپاشی منصوبہ میں مبینہ بے ضابطگیوں کے معاملے پر آئندہ حکمتِ عملی طے کرنے کے لیے کابینہ کی ذیلی کمیٹی بنانے کا فیصلہ کیا ہے۔ وزیر آبپاشی این اُتم کمار ریڈی نے بتایا کہ حکومت نے ابھی تک کوئی حتمی فیصلہ نہیں کیا، تاہم جلد پیش رفت متوقع ہے۔
انہوں نے انکشاف کیا کہ حکومت کو مرکزی تحقیقاتی ادارے کو خط لکھے نو ماہ گزر چکے ہیں لیکن اب تک کوئی کارروائی نہیں ہوئی۔ اسی سلسلے میں وزیر اعلیٰ اور وزیر خود متعلقہ حکام سے ملاقات کریں گے۔
وزیر نے واضح کیا کہ ہائی کورٹ نے سابق وزیر اعلیٰ کے سی آر اور سابق وزیر ہریش راؤ کو کلین چٹ نہیں دی۔ عدالت نے صرف کچھ تکنیکی وجوہات کی بنیاد پر فوری کارروائی سے روک دیا ہے، کیونکہ متعلقہ افراد کو نوٹس درست طریقے سے جاری نہیں کیے گئے تھے۔
عدالت نے یہ بھی تسلیم کیا کہ تحقیقی کمیشن قانونی ہے اور اس کی رپورٹ برقرار ہے۔ اس رپورٹ میں منصوبے کی منصوبہ بندی، تعمیر، معیار اور دیکھ بھال میں بے ضابطگیوں کی نشاندہی کی گئی ہے اور متعدد اعلیٰ عہدیداروں کو ذمہ دار ٹھہرایا گیا ہے۔
