ناکامیوں کے باوجود میرے والد نے مجھ پر یقین رکھا خلائی ادارے کے سربراہ کا جذباتی پیغام
بھارت کے نجی خلائی ادارے کے سربراہ پون کمار چندانا نے اپنے پہلے کامیاب مداری راکٹ کی کامیابی کے بعد ایک جذباتی پیغام جاری کرتے ہوئے اپنی زندگی کے مشکل دنوں اور اپنے والد کی قربانیوں کو یاد کیا۔ انہوں نے کہا کہ جب راکٹ کامیابی کے ساتھ خلا میں داخل ہوا تو وہ اپنے جذبات پر قابو رکھ سکے، لیکن والد کا ذکر کرتے ہوئے آج بھی آنسو نہیں روک پاتے۔
انہوں نے بتایا کہ راکٹ کی روانگی کے بعد ان کے والد مسلسل رو رہے تھے اور خاموشی سے سب کچھ محسوس کر رہے تھے۔ اس خاموشی میں وہ تمام جدوجہد چھپی تھی جس نے انہیں اس مقام تک پہنچایا۔
پون کمار چندانا نے کہا کہ بچپن میں وہ پڑھائی میں زیادہ اچھے نہیں تھے۔ آٹھویں جماعت تک انہیں اکثر صرف آٹھ سے دس نمبر ہی ملتے تھے، جبکہ ریاضی میں ایک بار صرف اکیاون نمبر حاصل ہوئے اور ایک مضمون میں ناکامی بھی ہوئی۔ اس کے باوجود ان کے والد نے کبھی ان پر اعتماد کھونے نہیں دیا اور ہمیشہ بڑے خواب دیکھنے کی تلقین کی۔
انہوں نے کہا کہ کبھی تصور بھی نہیں کیا تھا کہ انہیں ملک کے ممتاز تکنیکی ادارے میں داخلہ ملے گا یا وہ ملک کے پہلے نجی راکٹ منصوبے کا حصہ بنیں گے۔ ان کے مطابق یہ سب ان کے والد کے یقین، حوصلے اور مسلسل حوصلہ افزائی کا نتیجہ ہے۔
پون کمار چندانا کا تعلق حیدرآباد سے ہے۔ انہوں نے اپنی ابتدائی تعلیم یہیں حاصل کی اور بعد میں اعلیٰ تعلیم کے دوران اپنے ساتھی کے ساتھ مل کر ایک نجی خلائی ادارہ قائم کیا، جو آج ملک کے خلائی شعبے میں اہم کامیابیاں حاصل کر رہا ہے۔
