برٹش کولمبیا میں جنگلاتی آگ بے قابو، 20 ہزار سے زائد افراد محفوظ مقامات پر منتقل

کینیڈا کے مغربی صوبے برٹش کولمبیا میں تیزی سے پھیلتی جنگلاتی آگ نے خطرناک صورتحال اختیار کرلی، جس کے بعد حکومت نے ہنگامی حالت نافذ کردی۔ حکام کے مطابق آگ کے باعث 20 ہزار سے زائد افراد کو اپنے گھروں سے محفوظ مقامات کی جانب منتقل ہونا پڑا، جبکہ مزید علاقوں کو بھی خطرہ لاحق ہے۔

اوکاناگن جھیل کے قریب واقع سمرلینڈ اور پیچ لینڈ کے رہائشیوں کو فوری طور پر علاقہ خالی کرنے کی ہدایت کی گئی۔ جمعہ کو دریافت ہونے والی بالڈ رینج آگ ہفتے کی صبح تک تقریباً دوگنی ہوگئی، جس کے باعث امدادی اداروں کے اہلکار بھی اپنے خاندانوں کو محفوظ مقامات پر منتقل کرنے پر مجبور ہوگئے۔

وزیرِاعلیٰ ڈیوڈ ایبی نے بتایا کہ ایک فائر فائٹنگ افسر نے آگ کی شدت کو ’’بم پھٹنے‘‘ سے تشبیہ دی۔ ان کے مطابق شعلے درختوں کی چوٹیوں سے سیکڑوں فٹ بلند ہو رہے ہیں اور آگ اپنا موسمی نظام پیدا کر رہی ہے، جس کے نتیجے میں آسمانی بجلی گرنے اور آگ کے مزید پھیلنے کا خطرہ بڑھ گیا ہے۔

آگ میں پھنسے افراد کی تلاش کے لیے امدادی اور تلاش کا عمل جاری ہے۔ بعض علاقوں میں پھنسے شہریوں کو فضائی راستے سے نکالا جا رہا ہے۔ سمرلینڈ کے قریب ایک ممکنہ ہلاکت کی بھی تحقیقات جاری ہیں، تاہم خطرناک حالات کے باعث حکام ابھی اس کی تصدیق نہیں کر سکے۔

کینیڈا کے وزیرِاعظم مارک کارنی نے فائر فائٹرز اور امدادی کارکنوں کی خدمات کو سراہتے ہوئے ہر ممکن حکومتی تعاون کی یقین دہانی کرائی ہے۔

حکام کے مطابق صوبے میں 102 جنگلاتی آگ رپورٹ ہوچکی ہیں۔ شدید گرمی، تیز ہواؤں اور طویل خشک سالی کے باعث آگ پر قابو پانا مشکل ہے۔ رواں سال کینیڈا میں تقریباً 40 لاکھ ہیکٹر رقبہ جنگلاتی آگ سے متاثر ہوچکا ہے۔