کانگریس کے رکن پارلیمنٹ راہل گاندھی نے پارلیمنٹ کے قریب طلبہ کے احتجاج کے دوران پولیس کی مبینہ کارروائی پر سخت اعتراض کرتے ہوئے مرکزی حکومت کو شدید تنقید کا نشانہ بنایا ہے۔ انہوں نے کہا کہ طلبہ کے سوالات کا جواب دینا حکومت کی ذمہ داری ہے اور اس واقعے پر وزیر داخلہ امت شاہ کو جواب دینا چاہیے۔
راہل گاندھی نے الزام عائد کیا کہ احتجاج کرنے والے طلبہ کے خلاف پیلٹ گن، نوکیلی لاٹھیوں اور آنسو گیس کا استعمال کیا گیا۔ ان کے مطابق پرامن انداز میں سوال اٹھانے والے نوجوانوں پر طاقت کا استعمال ناقابل قبول ہے۔ انہوں نے دعویٰ کیا کہ احتجاج کے دوران خواتین طالبات کے ساتھ بھی مبینہ بدسلوکی کی گئی اور کئی افراد زخمی ہوئے۔
راہل گاندھی نے الزام لگایا کہ اپوزیشن کی جانب سے طلبہ پر مبینہ تشدد کے معاملے پر بحث کے لیے پیش کی جانے والی تجاویز کو مسلسل مسترد کیا گیا۔ ان کے مطابق حکومت کی خاموشی کو محض غفلت قرار نہیں دیا جا سکتا۔
انہوں نے کہا کہ حکمرانوں کو اس معاملے پر ذمہ داری قبول کرتے ہوئے جواب دینا ہوگا۔ راہل گاندھی نے واقعے کی سپریم کورٹ کی نگرانی میں آزادانہ تحقیقات کا مطالبہ کرتے ہوئے واضح کیا کہ طلبہ کو انصاف ملنے تک احتجاج جاری رکھنے کی حمایت کی جائے گی۔
