شاہ رخ خان کی سالگرہ پر ’منت‘ کے باہر مداحوں کا ہجوم، بالکونی میں نہیں آئے مگر ہاتھ سے لکھا پیغام بھیجا

بالی ووڈ سپر اسٹار شاہ رخ خان نے اپنی 61ویں سالگرہ کے موقع پر ممبئی میں واقع اپنی رہائش گاہ منت کے باہر جمع ہونے والے ہزاروں مداحوں کو ایک خصوصی تحفہ دیا۔ اداکار اس مرتبہ نصف شب کو اپنی روایت کے مطابق بالکونی میں آکر مداحوں سے ملاقات کے لیے باہر نہیں آئے، تاہم انہوں نے ہاتھ سے لکھا ہوا ایک پیغام بڑی اسکرین کے ذریعے مداحوں تک پہنچایا۔

شاہ رخ خان نے پیر، 2 نومبر کو اپنی سالگرہ منائی۔ ہر سال ان کی سالگرہ کے موقع پر بڑی تعداد میں مداح رات 12 بجے باندرہ میں واقع منت کے باہر جمع ہوتے ہیں اور اداکار کی ایک جھلک دیکھنے کے منتظر رہتے ہیں۔ اس مرتبہ شاہ رخ خان کی رہائش گاہ کی تعمیرِ نو اور توسیعی کام کے باعث وہ عارضی طور پر وہاں مقیم نہیں ہیں، جس کی وجہ سے ان کی روایتی بالکونی آمد نہیں ہوسکی۔

مداحوں کے لیے دکھائے گئے ہاتھ سے تحریر کردہ پیغام میں شاہ رخ خان نے لکھا، ’’آپ سب کی مبارکباد اور محبت کا شکریہ۔ میری طرف سے بھی آپ سب کے لیے ڈھیر ساری محبت۔‘‘ انہوں نے پیغام کے اختتام پر لکھا کہ سب کو بہت سارا پیار اور ایک بڑی سی جھپی۔

فلم ’کنگ‘ کے پوسٹرز اور مکالموں کی نمائش

سالگرہ کی تقریب کے موقع پر منت کو شاہ رخ خان کی آنے والی فلم ’کنگ‘ کے بڑے بڑے پوسٹرز اور خصوصی مناظر سے سجایا گیا تھا۔ اسکرین پر فلم کے دو مکالمے ’’کنگ اکیلا کافی ہے‘‘ اور ’’ڈر نہیں، دہشت ہوں‘‘ بھی دکھائے گئے، جس سے مداحوں میں فلم کے حوالے سے جوش مزید بڑھ گیا۔

24 دسمبر کو ریلیز ہوگی فلم کنگ

سدھارتھ آنند کی ہدایت کاری میں بننے والی ایکشن فلم ’کنگ‘ 24 دسمبر 2026 کو سینما گھروں میں ریلیز ہوگی۔ شاہ رخ خان اور سدھارتھ آنند فلم ’پٹھان‘ کے بعد دوبارہ ایک ساتھ کام کررہے ہیں۔

اس فلم میں شاہ رخ خان پہلی مرتبہ اپنی بیٹی سہانا خان کے ساتھ اسکرین شیئر کرتے نظر آئیں گے۔ فلم کی دیگر اہم کاسٹ میں دیپیکا پڈوکون، رانی مکھرجی، ابھیشیک بچن، ارشد وارثی، انیل کپور، جے دیپ اہلاوت اور راگھو جیول شامل ہیں۔

شاہ رخ خان کی آخری فلم ’ڈنکی‘ دسمبر 2023 میں ریلیز ہوئی تھی۔ اس طرح ’کنگ‘ تین سال سے زائد عرصے بعد ان کی نئی سینما ریلیز ہوگی۔