بھارتی وزیراعظم نریندر مودی نے کہا ہے کہ تعلیم کے ساتھ ساتھ کھیلوں کو بھی طلبہ کی زندگی میں اہمیت دی جانی چاہیے۔ ہفتے کے روز یومِ اساتذہ کے موقع پر مودی نے قومی اساتذہ ایوارڈز کے فاتحین سے ملاقات کی۔
اس موقع پر خطاب کرتے ہوئے وزیراعظم نے تجویز دی کہ اساتذہ کو صرف طلبہ کی تعلیم ہی نہیں بلکہ ان کی روزمرہ زندگی پر بھی توجہ دینی چاہیے۔ ان کا کہنا تھا کہ آج کے معاشرے میں مشترکہ خاندانی نظام کمزور ہوتا جا رہا ہے، ایسے میں اساتذہ کو طلبہ کی درست رہنمائی کرنی چاہیے۔ منشیات کے مسئلے کا حوالہ دیتے ہوئے انہوں نے کہا کہ اساتذہ کو مسلسل نظر رکھنی چاہیے کہ بچے کیا کر رہے ہیں اور ان میں کون سی عادات پروان چڑھ رہی ہیں۔
مودی نے کہا، ’’طلبہ کے اسکرین پر گزارے جانے والے وقت میں کمی لانا اب انتہائی ضروری ہو چکا ہے۔ اگر ہم ان میں کھیلوں اور تخلیقی جدت کا شوق پیدا کر سکیں تو انہیں موبائل فون سے دور رکھا جا سکتا ہے۔‘‘ انہوں نے مزید کہا کہ طلبہ کو وقتاً فوقتاً نئی ٹیکنالوجیز سے بھی روشناس کرایا جانا چاہیے، اور تدریس طلبہ کی زندگیوں میں بڑی تبدیلی لا سکتی ہے کیونکہ اساتذہ طلبہ کو ان کے خواب پورے کرنے میں کلیدی کردار ادا کرتے ہیں۔
واضح رہے کہ رواں سال 82 اساتذہ اور ماہرینِ تعلیم کو قومی اساتذہ ایوارڈز کے لیے منتخب کیا گیا ہے، جن میں اسکول ایجوکیشن اینڈ لٹریسی ڈیپارٹمنٹ کے 48 اساتذہ، اعلیٰ تعلیمی اداروں اور پولی ٹیکنکس کے 21 فیکلٹی ارکان اور اسکل ڈویلپمنٹ اینڈ انٹرپرینیورشپ ڈیپارٹمنٹ کے 13 ٹرینرز شامل ہیں۔ ایوارڈ یافتگان نے اس موقع پر اپنے تدریسی طریقہ ہائے کار اور تجربات وزیراعظم کے ساتھ شیئر کیے۔
