صحت مند زندگی کے لیے یوگا اپنانے کی اپیل، کولکتہ میں ہزاروں افراد کی شرکت
بھارتی وزیر اعظم نریندر مودی نے کہا ہے کہ یوگا آج دنیا کی سب سے بڑی اجتماعی سرگرمی بن چکا ہے، جو مختلف ممالک، ثقافتوں اور معاشروں کے لوگوں کو ایک دوسرے کے قریب لا رہا ہے۔ انہوں نے یہ بات بین الاقوامی یومِ یوگا کی بارہویں تقریب سے خطاب کرتے ہوئے کہی، جس کا مرکزی پروگرام کولکتہ کے ریڈ روڈ پر منعقد ہوا۔
وزیر اعظم نے کہا کہ اکیس جون، جو سال کا سب سے طویل دن سمجھا جاتا ہے، اب پوری دنیا میں یوگا کے دن کے طور پر پہچانا جاتا ہے۔ ان کے مطابق یوگا صرف جسمانی ورزش کا نام نہیں بلکہ یہ ایک ایسا طرزِ زندگی ہے جو انسان کو جسمانی، ذہنی اور روحانی طور پر متوازن بناتا ہے۔
مودی نے کہا کہ جدید دور میں بیشتر افراد کام، خوراک اور آرام کے درمیان توازن برقرار رکھنے میں مشکلات کا شکار ہیں۔ ایسے حالات میں یوگا انسان کو متوازن زندگی گزارنے کا طریقہ سکھاتا ہے اور صحت مند عادات اپنانے میں مدد دیتا ہے۔ انہوں نے زور دے کر کہا کہ اچھی جسمانی صحت کا راستہ ذہنی سکون اور مضبوط ذہنی صحت سے ہو کر گزرتا ہے۔
وزیر اعظم کے مطابق یوگا انسان کے اندر امن، برداشت اور مثبت سوچ پیدا کرتا ہے، جو نہ صرف ذاتی زندگی بلکہ عالمی امن کے لیے بھی ضروری ہے۔ انہوں نے عوام سے اپیل کی کہ یوگا کو صرف ایک دن یا تقریب تک محدود نہ رکھا جائے بلکہ اسے روزمرہ زندگی، خاندان اور آنے والی نسلوں کا حصہ بنایا جائے۔
اس موقع پر انہوں نے کولکتہ کے شہریوں کو صفائی سے متعلق مہم میں فعال کردار ادا کرنے پر مبارکباد بھی دی۔ رواں سال بین الاقوامی یومِ یوگا کا موضوع "صحت مند بڑھاپے کے لیے یوگا” رکھا گیا ہے، جس کا مقصد ہر عمر کے افراد میں صحت مند اور متحرک طرزِ زندگی کو فروغ دینا ہے۔
واضح رہے کہ اقوام متحدہ نے دو ہزار چودہ میں اکیس جون کو بین الاقوامی یومِ یوگا قرار دیا تھا، جبکہ پہلی بار یہ دن دو ہزار پندرہ میں منایا گیا تھا۔
