ایپل کا 7 سال بعد فولڈ ایبل اسمارٹ فون مارکیٹ میں دھماکا ’آئی فون ڈوؤ‘ متعارف
کیلیفورنیا: ٹیکنالوجی کمپنی ایپل نے حریف کمپنیوں کے 7 سال بعد بالآخر اپنا پہلا فولڈ ایبل اسمارٹ فون ’آئی فون ڈوؤ‘ (iPhone Duo) متعارف کرا دیا ہے۔ نئے چیف ایگزیکٹو آفیسر (سی ای او) جان ٹرنس کی قیادت میں 9 ستمبر کو منعقدہ سالانہ ایونٹ میں پیش کیے گئے اس فون کی غیر معمولی قیمت نے شائقین کو حیرت میں ڈال دیا ہے، جہاں بھارت میں اس کے 256 جی بی ماڈل کی ابتدائی قیمت 2 لاکھ 99 ہزار 900 روپے رکھی گئی ہے۔
یہ فون اسٹار وائٹ اور نائٹ اسکائی رنگوں میں دستیاب ہوگا۔ اس کے پری آرڈرز 16 اکتوبر سے شروع ہوں گے جبکہ فروخت کا آغاز 23 اکتوبر سے ہوگا۔ ایونٹ میں آئی فون 18 پرو اور پرو میکس بھی پیش کیے گئے جن کی ابتدائی قیمتیں بالترتیب 1 لاکھ 64 ہزار 900 اور 1 لاکھ 79 ہزار 900 روپے ہیں۔ تاریخ میں پہلی بار ایپل نے بنیادی ماڈل ’آئی فون 18‘ کو لانچ نہیں کیا، جس کی آمد اب 2027 کے اوائل میں متوقع ہے۔
آئی فون ڈوؤ میں 5.4 انچ کی بیرونی اسکرین دی گئی ہے جو کھلنے پر 7.6 انچ کی بڑی اندرونی اسکرین میں تبدیل ہو جاتی ہے۔ ٹائٹینیم فریم، سیرامک شیلڈ 2 اور آئی پی 68 ریٹنگ کا حامل یہ فون کھلنے پر اب تک کا سب سے پتلا آئی فون قرار دیا گیا ہے۔ اسکرین کے موڑ پر شکن کو کم ترین سطح پر رکھنے کے لیے کاربن فائبر پلیٹ کا استعمال کیا گیا ہے۔ جگہ کی کمی کے باعث اس میں فیس آئی ڈی موجود نہیں ہے بلکہ پاور بٹن میں ٹچ آئی ڈی دی گئی ہے، جبکہ یہ یو ایس بی سی ایپل پنسل کو بھی سپورٹ کرتا ہے۔
