کیرالہ کے وایناڈ ضلع میں منگل کے روز شدید لینڈ سلائیڈنگ کے باعث کم از کم دو افراد ہلاک جبکہ متعدد افراد ملبے تلے دب گئے۔ حکام کے مطابق ہلاکتوں میں مزید اضافے کا خدشہ ہے۔
یہ حادثہ کلالڈی کے قریب میناکشی پل کے پاس پیش آیا، جہاں کوزی کوڈ اور وایناڈ کو ملانے والے سرنگی سڑک منصوبے پر کام جاری تھا۔ واقعے کے بعد قومی آفات سے نمٹنے والی فورس، فائر بریگیڈ، پولیس، محکمہ جنگلات اور مقامی افراد نے فوری طور پر امدادی کارروائیاں شروع کر دیں۔
عینی شاہدین کی ویڈیوز میں دیکھا جا سکتا ہے کہ اچانک مٹی کا بڑا تودہ پل اور سڑک پر آ گرتا ہے، جبکہ لوگ جان بچانے کے لیے بھاگتے نظر آتے ہیں۔ ایک ٹینکر بھی مٹی کے ریلے میں بہہ گیا، تاہم بعض افراد معجزانہ طور پر محفوظ رہے۔
ضلعی انتظامیہ کے مطابق سات افراد تاحال لاپتہ ہیں جبکہ زخمیوں کو قریبی اسپتالوں میں منتقل کیا گیا ہے۔ مسلسل بارش کے باعث قریبی آبادیوں کو بھی محفوظ مقامات پر منتقل کیا جا رہا ہے۔
دوسری جانب کیرالہ کے وزیر زراعت نے اس واقعے کو قدرتی نہیں بلکہ انسانی غفلت کا نتیجہ قرار دیتے ہوئے کہا کہ کھدائی سے نکالی گئی مٹی کو غیر سائنسی انداز میں جمع کرنے کی وجہ سے یہ حادثہ پیش آیا۔
ادھر محکمہ موسمیات نے وایناڈ اور کوزی کوڈ میں سرخ انتباہ جاری کرتے ہوئے شہریوں کو انتہائی احتیاط برتنے کی ہدایت دی ہے۔
