کاکروچ جنتا پارٹی کے بانی ابھیجیت ڈپکے نے سونم وانگچک کو صفدر جنگ اسپتال منتقل کیے جانے کے بعد غیر معینہ مدت کی بھوک ہڑتال شروع کر دی ہے۔ تنظیم نے احتجاج مزید تیز کرتے ہوئے اعلان کیا ہے کہ 20 جولائی کو ہونے والا پارلیمنٹ مارچ ہر صورت میں ہوگا۔
ابھیجیت ڈپکے نے کہا کہ سونم وانگچک کو احتجاجی مقام جنتر منتر سے زبردستی ہٹایا گیا، تاہم اس سے تحریک ختم نہیں ہوگی۔ انہوں نے حکومت سے جوابدہی کا مطالبہ کرتے ہوئے کہا کہ احتجاج اس وقت تک جاری رہے گا جب تک مطالبات تسلیم نہیں کیے جاتے۔
تنظیم کے ترجمان نے الزام لگایا کہ پولیس کارروائی کے دوران بعض مظاہرین کے ساتھ سخت رویہ اختیار کیا گیا۔ دوسری جانب دہلی پولیس کا کہنا ہے کہ سونم وانگچک کی صحت بگڑنے اور عدالتی ہدایات کے بعد انہیں ضروری طبی نگہداشت کے لیے اسپتال منتقل کیا گیا۔
دوسری جانب سونم وانگچک کی اہلیہ نے مطالبہ کیا ہے کہ ان کی اجازت اور ذاتی ڈاکٹروں کی مشاورت کے بغیر انہیں کوئی طبی علاج نہ دیا جائے۔ احتجاجی تنظیم نے ایک ویڈیو بھی جاری کی ہے، جس میں سونم وانگچک اسپتال منتقل ہونے سے انکار کرتے دکھائی دیتے ہیں۔
ادھر جنتر منتر پر احتجاج جاری ہے اور کئی طلبہ رہنما بھی اظہارِ یکجہتی کے طور پر بھوک ہڑتال جاری رکھے ہوئے ہیں۔ مظاہرین کا کہنا ہے کہ ان کا مقصد مبینہ امتحانی بے ضابطگیوں کے خلاف شفاف کارروائی کا مطالبہ کرنا ہے۔
