ایران۔امریکہ مذاکرات میں بڑی پیش رفت، آبنائے ہرمز پر اہم اتفاق

مشرق وسطیٰ میں جاری کشیدگی کے خاتمے کے لیے ایران اور امریکہ کے درمیان ہونے والے اعلیٰ سطحی مذاکرات کے پہلے دور میں اہم پیش رفت سامنے آئی ہے۔ سوئٹزرلینڈ میں ہونے والے مذاکرات کے بعد ثالثی کا کردار ادا کرنے والے پاکستان اور قطر نے مشترکہ بیان جاری کرتے ہوئے بتایا کہ فریقین نے کئی اہم امور پر اتفاق کیا ہے۔

مشترکہ بیان کے مطابق مذاکرات مثبت اور تعمیری ماحول میں ہوئے، جہاں آئندہ تکنیکی سطح کی بات چیت کے لیے ایک واضح طریقہ کار بھی طے کیا گیا۔ سب سے اہم پیش رفت آبنائے ہرمز میں ممکنہ کشیدگی اور غلط فہمیوں سے بچنے کے لیے فریقین کے درمیان ایک خصوصی رابطہ نظام قائم کرنے پر اتفاق ہے۔ اس اقدام کا مقصد تجارتی جہازوں کی محفوظ آمد و رفت کو یقینی بنانا ہے۔

بیان میں کہا گیا کہ ایران، امریکہ اور لبنان کے درمیان ایک خصوصی رابطہ مرکز بھی قائم کیا جائے گا، جس کا مقصد لبنان میں فوجی کارروائیوں کے خاتمے اور جنگ بندی پر عمل درآمد کو یقینی بنانا ہے۔

فریقین نے اس بات پر بھی اتفاق کیا کہ آئندہ 60 دن کے اندر جنگ کے خاتمے کے لیے ایک حتمی معاہدے تک پہنچنے کی کوشش کی جائے گی۔ اس مقصد کے لیے ہفتے بھر تکنیکی مذاکرات جاری رہیں گے۔

دوسری جانب ایرانی وزیر خارجہ سید عباس عراقچی نے مذاکرات کو بڑی کامیابی قرار دیتے ہوئے کہا کہ پاکستان اور قطر کی ثالثی نے اہم پیش رفت ممکن بنائی ہے۔ ان کے مطابق بعض معاشی پابندیوں میں نرمی، منجمد اثاثوں کی جزوی بحالی اور تعمیر و ترقی کے منصوبوں پر بھی بات چیت ہوئی ہے۔

ماہرین کا کہنا ہے کہ اگر یہ سفارتی عمل کامیاب رہا تو نہ صرف لبنان میں جاری کشیدگی کم ہو سکتی ہے بلکہ پورے مشرق وسطیٰ میں امن و استحکام کے امکانات بھی روشن ہو جائیں گے۔