ایران اور امریکہ کے درمیان جاری کشیدگی ایک بار پھر شدت اختیار کر گئی ہے۔ اطلاعات کے مطابق ایران نے اردن میں حملوں کے بعد اب کویت میں موجود امریکی فوجی اڈوں کو بھی نشانہ بنایا ہے، جس سے پورے خطے میں تشویش کی لہر دوڑ گئی ہے۔
امریکی فوج کے مرکزی کمان نے تصدیق کی ہے کہ ایران نے اسلامی انقلابی گارڈ کور کے ذریعے امریکی تنصیبات پر حملے کیے۔ ذرائع کے مطابق ان حملوں میں مختلف فوجی اہداف کو نشانہ بنایا گیا، جبکہ بعض مقامات پر نقصان کی بھی اطلاعات موصول ہوئی ہیں۔
دوسری جانب کویت کی حکومت نے بھی تصدیق کی ہے کہ ملک میں موجود دو اہم امریکی فوجی اڈوں کو ہدف بنایا گیا۔ ان میں کیمپ عُدیدی میں قائم امریکی فوجی مرکز اور علی السالم فضائی اڈہ شامل ہیں، جہاں حملوں کے بعد سائرن بجا دیے گئے اور ہنگامی حفاظتی اقدامات نافذ کر دیے گئے۔
رپورٹس کے مطابق حملوں کے بعد امریکی اور اتحادی افواج کو ہائی الرٹ کر دیا گیا ہے، جبکہ متعلقہ علاقوں میں سکیورٹی مزید سخت کر دی گئی ہے۔ تاحال کسی بڑے جانی نقصان کی سرکاری تصدیق سامنے نہیں آئی، تاہم صورتحال پر مسلسل نظر رکھی جا رہی ہے۔
