ہندوستانی خلائی تحقیقی ادارے اسرو آج جمعہ کی رات 11 بج کر 51 منٹ پر اپنے اہم خلائی مشن جی ایس ایل وی-ایف 18 کے ذریعے نیویگیشن سیٹلائٹ این وی ایس-03 لانچ کرنے جا رہا ہے۔ یہ لانچ آندھرا پردیش کے سری ہری کوٹہ میں واقع ستیش دھون خلائی مرکز کے دوسرے لانچ پیڈ سے انجام دی جائے گی۔ اس مشن کا مقصد ہندوستان کے اپنے نیویگیشن نظام نیویک کی صلاحیتوں کو مزید مضبوط بنانا ہے۔
اسرو کے مطابق، این وی ایس-03 ہندوستان کے دوسری نسل کے نیویگیشن سیٹلائٹس کی سیریز کا تیسرا سیٹلائٹ ہے۔ اسے زمین کے گرد جیو سنکرونس ٹرانسفر مدار میں پہنچایا جائے گا۔ جی ایس ایل وی-ایف 18 ہندوستان کے جیو سنکرونس سیٹلائٹ لانچ وہیکل کی 20 ویں پرواز ہوگی۔ اس مشن کے لیے 24 گھنٹے کی الٹی گنتی جمعرات کی رات 11 بج کر 51 منٹ پر شروع ہوئی تھی۔
این وی ایس-03 میں کیا خاص بات ہے؟
این وی ایس-03 میں مقامی طور پر تیار کردہ ایٹمی گھڑی کے ساتھ دیگر ایٹمی گھڑیاں بھی نصب کی گئی ہیں۔ اس سیٹلائٹ کی ایک اہم خصوصیت یہ ہے کہ اس میں پہلے سے موجود ایل 5 اور ایس بینڈ سگنلز کے علاوہ ایل 1 نیویگیشن سگنل بھی شامل کیا گیا ہے۔ اس اضافی سگنل سے نیویک نظام کی نیویگیشن صلاحیتوں میں مزید بہتری آنے کی توقع ہے۔
اسرو کے مطابق، نیویک ہندوستان کا خودمختار علاقائی سیٹلائٹ نیویگیشن نظام ہے، جو ہندوستانی زمینی حدود اور اس کے اطراف تقریباً 1,500 کلومیٹر کے علاقے میں درست مقام، رفتار اور وقت سے متعلق خدمات فراہم کرنے کے لیے تیار کیا گیا ہے۔
عام شہریوں اور دیگر صارفین کو کیا فائدہ ہوگا؟
نیویک کے تحت دو طرح کی خدمات فراہم کی جاتی ہیں۔ پہلی اسٹینڈرڈ پوزیشننگ سروس عام شہریوں کے لیے ہے، جبکہ دوسری ریسٹرکٹڈ سروس خفیہ اور مخصوص مجاز صارفین کے لیے دستیاب ہوتی ہے۔ یہ نظام ٹرانسپورٹ، راستوں کی نشاندہی، مقام معلوم کرنے اور دیگر نیویگیشن سے متعلق سرگرمیوں میں استعمال کیا جاسکتا ہے۔
اسرو نے نیویک نظام کو مزید مضبوط بنانے کے لیے دوسری نسل کے پانچ نیویگیشن سیٹلائٹس تیار کرنے کا منصوبہ بنایا ہے۔ اس سلسلے کا پہلا سیٹلائٹ این وی ایس-01، 29 مئی 2023 کو جی ایس ایل وی-ایف 12 کے ذریعے لانچ کیا گیا تھا۔
